Press "Enter" to skip to content

በአዲስ አበባ ከተማ አስተዳደር በሚገኙ ተቋማት 77.7 ሚሊዮን ብር ከሕግ ውጪ መከፈሉን የኦዲት ሪፖርት አመላከተ

የአዲስ አበባ ከተማ አስተዳደር የዋና ኦዲተር መሥሪያ ቤት በ2013 ዓ.ም የበጀት ዓመት በአዲስ አበባ ከተማ አስተዳደር ሥር በሚገኙ የተመረጡ ተቋማት ላይ ባደረገው የፋይናንስ ሕጋዊነት ኦዲት፣ ከሕግ ውጪ የተከፈለ 77.7 ሚሊዮን ብር ማግኘቱን በሪፖርቱ አመላከተ፡፡

የከተማው ኦዲተር መሥሪያ ቤት የ2013 ዓ.ም የኦዲት ሪፖርት ቅዳሜ ሐምሌ 10 ቀን 2013 ዓ.ም.፣ በፌዴሬሽን ምክር ቤት አዳራሽ በተከናወነው የአዲስ አበባ ከተማ ምክር ቤት የ2013 ዓ.ም. ማጠቃለያ ጉባዔ ላይ አቅርቧል፡፡

በ2013 ዓ.ም. ባደረገው የተቋማት ኦዲት በርካታ ግኝቶች መኖራቸውን አስታውቆ፣ የምክር ቤቱን ትኩረት ሊያገኙ ይገባል ካላቸው ጉዳዮች መካከል ደንብና መመርያ ሳይከተሉ የተፈጸሙ ግዥዎች፣ የተከፈሉ አበሎችና በድጋሚ የተፈጸሙ ክፍያዎች ይጠቀሳሉ፡፡

በኦዲት ሪፖርቱ መሠረት በአዲስ አበባ ከተማ አስተዳደር ሥር በሚገኙ 33 ተቋማት ውስጥ ከደንብና መመርያ ውጪ ከተፈጸመ 72.7 ሚሊዮን ብር ውስጥ የአርሶ አደርና የከተማ ግብርና ልማት ኮሚሽን 20 ሚሊዮን ብር፣ የኮንስትራክሽን ቢሮ 19 ሚሊዮን ብር፣ የሠራተኛና ማኅበራዊ ጉዳይ ቢሮ 15.3 ሚሊዮን ብር መመርያ ሳይከተሉ ግዥ ከፈጸሙ ተቋማት መካከል ይገኙበታል፡፡

የከተማው ፐብሊክ ሰርቪስና የሰው ሀብት ልማት ቢሮ ያወጣው የአበል መመርያ ተግባራዊነቱን በሚመለከት በተደረገ ኦዲት በ42 ተቋማት 4.6 ሚሊዮን ብር ከመመርያ ውጪ ክፍያ መፈጸሙ የተረጋገጠ ሲሆን፣ ከእዚህም ውስጥ የአራዳ ክፍለ ከተማ ኮንስትራክሽን ጽሕፈት ቤት 773,700 ብር፣ የአራዳ ክፍለ ከተማ ፐብሊክ ሰርቪስና ሰው ሀብት ልማት ጽሕፈት ቤት 730,000 ብር፣ እንዲሁም የእንጦጦ ፖሊ ቴክኒክ ኮሌጅ 477,536 ብር በመክፈል ዋናዎቹ እንደሆኑ ተጠቅሷል፡፡

በብልጫ ወይም በድጋሚ ከተፈጸመ ክፍያ ጋር በተያያዘ በተደረገ ኦዲት በ13 ተቋማት ውስጥ በብልጫና በድጋሚ የተከፈለ 889,644.45 ብር መገኘቱ ተገልጿል፡፡ የውኃ ሳኒቴሽን መሠረተ ልማት ማስፋፊያ ቢሮ 380,493 ብር፣ የእሳትና አደጋ ሥጋት ሥራ አመራር ኮሚሽን 146,261.34 ብር፣ እንዲሁም የአካባቢ ጥበቃና አረንጓዴ ልማት ኮሚሽን 103,574 ብር ክፍያ ፈጽመው እንደተገኙ ሪፖርቱ ያመላክታል፡፡

የኦዲት መሥሪያ ቤቱ የግዥ ደንብና መመርያ ተከትለው በማይሠሩ ተቋማት ላይ የተጠናከረ ዕርምጃ ሊወሰድ እንደሚገባ ያሳሰበ ሲሆን፣ ከደንብና መመርያ ውጪ የተከፈለ ደመወዝና አበል፣ እንዲሁም ያላግባብ በብልጫ ወይም በድጋሚ የተከፈሉ ገንዘቦች ከሚመለከታቸው አካላት ተመላሽ ተደርጎ ሪፖርት እንዲደረግለት ባቀረበው ሪፖርት ጠይቋል፡፡

በተያያዘም ኦዲተር መሥሪያ ቤቱ ተቋማት በንብረት አስተዳደር መመርያ መሠረት ማስተዳደራቸውን ለማረጋገጥ ኦዲት ሲያደርግ፣ 53 ተቋማት የንብረት አያያዛቸው መመርያውን ያልተከተለ መሆኑንና በቂ ማስረጃ ባለመቅረቡ ኦዲት ማድረግ እንዳልቻለ አስታውቋል፡፡ ከእነዚህም ውስጥ አዲስ ሚዲያ ኔትወርክ፣ የአካባቢ ጥበቃና አረንጓዴ ልማት ኮሚሽን፣ ወሳኝ ኩነት ምዝገባና መረጃ ኤጀንሲ፣ እንዲሁም የአዲስ አበባ ጤና ቢሮ ተጠቅሰዋል፡፡

በአዲስ አበባ ከተማ መንገዶች ባለሥልጣን 153.4 ሚሊዮን ብር ዋጋ ያለው ሬንጅ ጥቅም ላይ ሳይውል ለረዥም ጊዜ ተከማችቶ ከመቆየቱም በላይ፣ በቂ ከለላ ስላልተደረገለት ለብልሽት የተጋለጠ መሆኑ ታይቷል ሲል ኦዲተር መሥሪያ ቤቱ በሪፖርቱ አቅርቧል፡፡

የአዲስ አበባ ከተማ መንገዶች ባለሥልጣን ዋና ዳይሬክተር ሞገስ ጥበቡ (ኢንጅነር)፣ በኦዲተር መሥሪያ ቤቱ በቀረበው ሪፖርት ላይ ለምክር ቤቱ በሰጡት ምላሽ፣ ባለሥልጣን መሥሪያ ቤቱ በከተማው ለሚያናውነው የመንገድ ግንባታ በየዓመቱ 25 ሺሕ በርሜል ሬንጅ እንደሚያስፈልገውና በተለይም የባንክ ኤልሲ (LC) ከመክፈት ጋር ተያይዞ ያለውን ረዥም ወረፋ ለመቅረፍ ተብለው በብዛት የገባ መሆኑን አስታውቀዋል፡፡

ሬንጁ በዚህ ወቅት ቢገዛ ቀደም ሲል ከተገዛበት ወጪ እጥፍ ዋጋ ይጠይቅ እንደነበር ያስረዱት ዋና ዳይሬክተሩ፣ ለብልሽት ያልተጋለጠ እንደሆነና ከአያያዝ ጋር የተፈጠረውን ክፍተት በማሻሻል ባለሥልጣኑ በ2014 ዓ.ም. ለሚያደርገው የመንገድ ግንባታና ጥገና ሙሉ በሙሉ እንደሚጠቀምበት አስታውቀዋል፡፡ ሪፖርተር

Be First to Comment

Leave a Reply

Your email address will not be published. Required fields are marked *

//glugreez.com/4/4057774