ለአምነስቲ ኢንተርናሽናል የኦርቶዶክስ ቄስ መስሎ ምስክር የሆነው ግለሰብ ቄስም አማኝም አይደለም ስትል ቤተክርስትያኗ አስታወቀች

ራሱን ቄስ ወልደማርያም እያለ የሚጠራው ሚካኤል በርሔ የኦርቶዶክስ ካህንም አማኝም አይደለም ሊቀ ጳጳስ አባ ጴጥሮስ፡፡ ራሱን ቄስ ወልደማርያም ነኝ ያለው ሚካኤል በርሔ ካህንም አማኝም እንዳልሆነ በኢትዮጵያ ኦርቶዶክስ ተዋህዶ ቤተክርስቲያን በሰሜን አሜሪካ የኒውዮርክና አካባቢው ሀገረ ስብከት ሊቀ ጳጳስ አባ ጴጥሮስ ገለጹ።

አባ ጴጥሮስ ለኢዜአ እንደገለጹት ከዚህ ቀደም በአውስትራሊያ በአገልግሎት ተመድበው ቆይተው በቅርቡ ወደ ሰሜን አሜሪካ ተዘዋውረዋል። ሰሞኑን ራሱን ቄስ ወልደማርያም በማለት ሀሰተኛ መረጃ ያሰራጨው ሚካኤል በርሔ የተባለ ግለሰብ የኢትዮጵያ ኦርቶዶክስ ተዋህዶ ቤተክርስቲያን አማኝም ካህንም እንዳልሆነ አረጋግጠዋል።

ሚካኤል በርሔ ሰሞኑን ራሱን ቄስ ወልደማርያም በሚል በለቀቀው የተንቀሳቃሽ ምስል በሕዳር 2013 በአክሱም ጽዮን ቤተክርስቲያን በፀሎትና በቅዳሴ ላይ እያለን የተኩስ ድምጽ ሰማን ስንወጣ የአማራ ልዩ ሃይልና የኤርትራ ወታደሮች እየተኮሱ ነበር ብሏል። ሊቀ ጳጳሱ ደግሞ እርሳቸው ባሉበት ሀገረ ስብከት ውስጥም ይህ ግለሰብ እንደሌለ ጠቁመዋል።

እንደ እርሳቸው ገለጻ ግለሰቡ መኖሪያው ቦስተን ከተማ እንደሆነና በአንድ ሆስፒታል ውስጥ በአስተርጓሚነት እንደሚሰራ ሰምተዋል። ከሁለት ሳምንት በፊት መቀሌ በነበሩበት ጊዜ ግለሰቡ ይህን ያህል ሰው አልቋል ብሎ የተናገረውን ሲሰሙ መደንገጣቸውን ነው የገለፁት።

በተመሳሳይ መቀሌ በነበሩበት ወቅት ለጉብኝት የሄዱ የሃይማኖት አባቶች ተባረሩ የሚል መረጃ ሰምተው የት ነው ያለሁት የሚል አግራሞት እንደፈጠረባቸው ተናግረዋል። አባ ጴጥሮስ የሰሙት ነገር ከፍተኛ ግርታ እንደፈጠረባቸው ገልፀው “ውሸት ሲዋሽ እንኳ ትንሽ ምክንያት ቢኖረው” ብለዋል።

አንድን ነገር ስለጠላነው ወይንም ስለተቃወምነው ብቻ ከመሬት የለቀቀ ውሸት መዋሸት መጨረሻ ላይ የሚጎዳው ራስን ነው ሲሉም አክለዋል። ሀሰተኞች የሚበዙት ሰሚ ስላገኙና ለምን ብሎ የሚጠይቅ ባለመኖሩ መሆኑን የተናገሩት ሊቀ ጳጳሱ ሕዝቡም እውነትን ከያዙ ሰዎች ጋር በእውነት እንዲሰራ መክረዋል።

ይህ ሰው ይህን ውሸት ስለተናገረ ለአክሱም ሕዘብ ምንም እንደማይጠቅመውና ለራስ፣ ለአገርና ለወገን ሲባል ከውሸት ቢቆጠብ መልካም ነው ብለዋል። ይህ ሰው አክሱም አልነበረም፣ የቤተክርስቲያኒቱ ካህን አይደለም፣ በቤተክርስቲያኒቱም አያገለግልም” ነው ያሉት። ሚካኤል በርሄ ይህን ሁሉ ያልሆነውን ነኝ ብሎ ከተናገረ ከዚህ የባሰ ውሸት እንደሚዋሽ ሁሉም አውቆ እንዲጠነቀቅ አሳስበዋል።

መገናኛ ብዙሃንም እንደዚህ አይነት ግለሰቦች መረጃዎችን ከማበላሸታቸው በፊት ተጨባጭ መረጃዎችን ለኅብረተሰቡ ማስተላለፍ እንደሚገባቸውም አባ ጴጥሮስ አሳስበዋል።

ቄስ ወልደማርያም ነኝ በማለት የሚንቀሳቀሰው ሚካኤል በርሔ በለቀቀው የተንቀሳቃሽ ምስል በአክሱም ጽዮን ቤተክርስቲያን በፀሎትና በቅዳሴ ላይ የአማራ ልዩ ሃይልና የኤርትራ ወታደሮች እየተኮሱ ነበር በሚል ሀሰተኛ መረጃው ዓለም አቀፉን ማኅበረሰብ ለማደናገር መሞከሩ ይታወሳል።

በተንቀሳቃሽ ምስሉ ራሱን ቄስ ወልደማርያም እያለ የሚጠራው ሚካኤል በርሔ የእምነት አባት ሳይሆን በአሜሪካ ቦስተን የሚኖር የህወሓት ካድሬ መሆኑ መገለጹ ይታወቃል።

Leave a Reply

Your email address will not be published. Required fields are marked *