Press "Enter" to skip to content

በአዲስ አበባ 495 የህዝብ መጸዳጃ ቤቶች ሊገነቡ ነው

በአዲስ አበባ ከተማ በአንድ ነጥብ ሁለት ቢሊዮን ብር 495 የህዝብ መጸዳጃ ቤቶች፣ መታጠቢያ(ሻወር) ቤቶችና በ151 ትምህርት ቤቶች ደግሞ የመመገቢያ አዳራሾች ለመገንባት ዝግጅቶች መጠናቀቃቸውን የአዲስ አበባ ከተማ የልማታዊ ሴፍትኔትና ምግብ ዋስትና ኤጀንሲ አስታወቀ።

የኤጀንሲው ምክትል ኃላፊ አቶ ታምራት እስጢፋኖስ በተለይ ለአዲስ ዘመን ጋዜጣ እንደገለጹት፤በአዲስ አበባ ከተማ 121 ወረዳዎች 495 የሕዝብ መጸዳጃ ቤቶችና መታጠቢያ ክፍሎች፣90 መጋዘኖችና በ151 ትምህርት ቤቶች ደግሞ የመመገቢያ አዳራሾች ለመገንባት ዝግጅቶች ተጠናቀዋል።

በአዲስ አበባ ነዋሪ ፍላጎት አማካኝነት 592 የተለያዩ ፕሮጀክቶች መለየታቸውን አመልክተው በህብረተሰቡ ጥያቄ መሰረትም በ400 ሚሊዮን ብር ወጪ 402 መጸዳጃ ቤቶች፣ 59 መታጠቢያና መጸዳጃ ቤቶች፣ 41 ሻወር ቤቶች እና 90 መጋዘኖች በሴፍትኔት ተጠቃሚዎች አማካኝነት ለመገንባት አስፈላጊው ዝግጅት መጠናቀቃቸውን ተናግረዋል።

በ121 ወረዳዎች ለሚገነቡት የህዝብ መጸዳጃ ቤቶች፣መታጠቢያና መጸዳጃ ቤቶች ፣መታጠቢያ ቤቶችና መጋዘኖች ግንባታ የሚያገለግሉ ግብዓቶች ማለትም ብሎኬት ፣ብረትና ቆርቆሮ ግዥ ተፈጽሞ ወደ ሚገነቡበት ቦታ የማጓጓዙ ተግባር እንደተከናወነ አመልክተው የጠጠር፣ድንጋይ፣ አሸዋና የሴራሚክ ግዥ ለማከናወን በሂደት ላይ እንደሚገኙና በቅርቡ በሴፍትኔት ተጠቃሚዎች ግንባታቸው እንደሚጀመር አብራርተዋል።

592 ፕሮጀክቶች በስድስት ወራት ውስጥም ግንባታቸው ተጠናቆ ለአገልግሎት ይበቃሉ ተብሎ እንደሚጠበቅም አመልክተዋል። 800 ሚሊዮን ብር ወጪ በአንደኛ ደረጃና በቅድመ መደበኛ 151 ትምህርት ቤቶች ላይ የመመገቢያ አዳራሽና ማብሰያ ክፍሎች ዲዛይን ተዘጋጅቶ በግንባታው የሚሳተፉ ተቋራጮችን ለመለየት ጨረታ መውጣቱት ጠቅሰው፣የመመገቢያ አዳራሾችና የማብሰያ ክፍሎች እስከ ህዳር 30 ቀን 2013 ዓ.ም ድረስ ይጠናቀቃሉ ተብሎ እንደሚጠበቁም ተናግረዋል።

በዓለም ባንክ አሰራር መሰረት በልማታዊ ሴፍትኔት የሚሰሩ የልማት ስራዎች 70 በመቶ በሴፍትኔት ተጠቃሚዎች ጉልበት 30 በመቶ ደግሞ በካፒታል የሚሰሩ ቢሆንም በኮቪድ 19 ምክንያት የምግብ ዋስትና ተጠቃሚዎችን ማሰራት ባለመቻሉ ከባንኩ ጋር በተደረገ ውይይት ከባንኩ አሰራር ውጭ በ151 ትምህርት ቤቶች ደግሞ የሚገነቡ መመገቢያ አዳራሾችና ማብሰያ ክፍሎች በስራ ተቋራጮች እንዲሰሩ መግባባት ላይ መደረሱንና 12 ስራ ተቋራጮች ግንባታውን እንደሚያካሄዱ ገልጸዋል።

በልማታዊ ሴፍትኔት አማካኝነት የሚካሄዱት ግንባታዎችም ለ33ሺህ ዜጎች የስራ ዕድል ይፈጥራል ተብሎ እንደሚጠበቅም ተናግረዋል። በአዲስ አበባ ከተማ በሶስት ዙሮች 410ሺ ሰዎች በምግብ ዋስትና ፕሮግራም ተጠቃሚ እንደሆኑ ለማወቅ ተችሏል። አዲስ ዘመን

More from UncategorizedMore posts in Uncategorized »

Be First to Comment

Leave a Reply

Your email address will not be published. Required fields are marked *