የኮሮናቫይረስ ምርመራ በመቀሌ ተጀመረ

የኮሮናቫይረስ (ኮቪድ-19) ምርመራ በመቀሌ መጀመሩንና ሌሎች ሦስት ቦታዎች ላይ ምርመራውን ለማስጀመር ዝግጅት መጠናቀቁን የጤና ሚኒስትር ዶክተር ሊያ ታደሰ ገለጹ።

ሚኒስትሯ ዶክተር ሊያ ለኢዜአ እንደተናገሩት፤ አዲስ አበባ ውስጥ የኮሮናቫይረስ ምርመራ ከጀመሩ ሦስት ተቋማት በተጨማሪ በክልሎችም ለማስጀመር እየተሰራ ነው።

አሁን ላይም በአራት ቦታዎች ላይ የኮሮናቫይረስ ምርመራ ለማድረግ ዝግጅት መጠናቀቁን ገልጸው፤ ከእነዚህም መካከል በመቀሌ የምርመራ ሥራ መጀመሩን ጠቁመዋል።

ባህርዳር፣ አዳማና ሐረማያ ዩኒቨርስቲዎች ላይ ምርመራውን ለመጀመር አስፈላጊው ዝግጅት መጠናቀቁንና በቅርቡ ምርመራው የሚጀመር መሆኑንም ጠቁመዋል።

በተጨማሪ በጂግጂጋ፣ አርሲ፣ ጅማ፣ ጎንደርና ሐዋሳ ምርመራውን ለመጀመር ሥልጠናዎች ተጠናቀው አስፈላጊው ቁሳቁስ እየተሟላላቸው መሆኑን ተናግረዋል።

ጎን ለጎንም አዲስ ለሚቋቋሙት የምርመራ ማዕከሎች የኅብረተሰብ ጤና ኢንስቲትዩት አስፈላጊውን የቴክኒክ ድጋፍ እየሰጠ መሆኑን አስረድተዋል።

በቀጣይ ደግሞ በደሴና አርባምንጭ ምርመራውን ለማስጀመር ለጤና ባለሙያዎች ሥልጠና መስጠት እንደሚጀመር ተናግረዋል። እነዚህ ተግባራት በክልሎች አካባቢ የሚደረገውን የምርመራ ሥራ በከፍተኛ ደረጃ እንደሚያጠናክሩት ጠቁመዋል።

ማንኛውም ሰው የበሽታው ስሜት ካለው ለጤና ተቋማት በማሳወቅ ምርመራውን በአፋጣኝ ማግኘት እንዳለበት ጥሪ አቅርበዋል። በተጓዳኝም ኅብረተሰቡ የቫይረሱን ስርጭት ለመከላከል የሚያደርገውን ጥንቃቄ አሁንም አጠናክሮ መቀጠል እንዳለበት ሚኒስትሯ አሳስበዋል።

Leave a Reply

Your email address will not be published. Required fields are marked *