በዓለ ጥምቀተ ክርስቶስ የዓለም ቅርስ ሆኖ መመዝገቡ የቤተ ክርስቲያናችን የአገራችንና የሕዝባችን ስም በዓለም ላይ እንዲታወቅ ያደርጋል-ፓትርያርክ ቀዳማዊ ማትያስ


የኢትዮጵያ ኦርቶዶክስ ተዋሕዶ ቤተክርስቲያን ፓትርያርክ ቀዳማዊ ማትያስ የጥምቀተ ክርስቶስ በዓል በኢትዮጵያ ስም በተመድ የትምህርት የሳይንስ እና የባሕል ድርጅት መመዝገቡን አስመልክቶ የእንኳን ደስ አላችሁ መግለጫ አስተላለፉ።

ፓትርያርክ ማትያስ ኢትዮጵያ አገረ እግዚአብሔር ሕዝቧም ሕዝበ እግዚአብሔር እንደሆነ ከሚታወቅባቸው ጉልሕ ማስረጃዎች አንዱ የሆነው እና በየዓመቱ ጥር አስራ አንድ በመላ አገሪቱ በኅብረት የሚከበረው በዓለ ጥምቀተ ክርስቶስ ነው ብለዋል በመግለጫቸው።

ይህ በዓል በዩኔስኮ እንዲመዘገብ የኢትዮጵያ ቤተ ክርስቲያን እና መንግሥት እንዲሁም መላው ሕዝብ ሲያደርጉት የነበረው ጥረት እውን በመሆኑም ደስታችን ወሰን የለውም በማለት ተናግረዋል።

በዓለ ጥምቀተ ክርስቶስ የዓለም ቅርስ ሆኖ መመዝገቡ የቤተ ክርስቲያናችን የአገራችንና የሕዝባችን ስም በዓለም ላይ ደምቆ እና ጐልቶ እንዲታወቅ አገራችንም በቱሪዝም ዘርፍ ተጠቃሚ እንድትሆን እገዛ ያደርጋል በማለት ተናግረዋል።

ይህ እውን ሊሆን የሚችለው ግን መላው የኢትዮጵያ ሕዝብ የአገሪቱ ባሕል እና የቱሪዝም ተቋም ብሎም በየአገሩ የሚገኙ የቤተ ክርስቲያናችን መሪዎች እና አምባሳደሮች ስለበዓሉ ታላቅነት ተወዳጅነት እና ዕሴት ያለማቋረጥ የማስተዋወቅ ሥራ ሲሠሩ እንደሆነ ግንዛቤ ሊወሰድበት ይገባል ሲሉም አክለዋል።

አያይዘውም የኢትዮጵያ ኦርቶዶክስ ተዋሕዶ ቤተ ክርስቲያን ሊቃውንት ካህናት ምእመናን እና የሰንበት ትቤት ወጣቶች የጥምቀተ ክርስቶስ በዓል አከባበር ውብ እና ሳቢ ማራኪ እና ተወዳጅ ሆኖ እንዲቀጥል ማድረግ ይጠበቅባችኋል በማለት አሳስበዋል።

በመጨረሻም የተመድ የትምህርት የሳይንስ እና የባሕል ድርጅት በዓለ ጥምቀተ ክርስቶስ በኢትዮጵያ ስም በዓለም የማይዳሰሱ ቅርሶች መዝገብ እንዲመዘገብ ላሳለፈው ውሳኔ ምስጋና አቅርበዋል። ምንጭ የኢኦተቤ መገናኛ ብዙኃን አገልግሎት ስርጭት ድርጅት


yeahun

0 Comments

Your email address will not be published. Required fields are marked *

0Shares