የኡጋዴን ነፃ አውጭ ግንባር(ኦብነግ) በብልፅግና ፓርቲ ሀሳብ እንደማይስማማ ገለፀ!


የኬንያው ኬቲኤን ቴሌቪዥን ጣቢያ ዛሬ ከኦብነግ ሊቀመንበሩ ዶ/ር አብዱራህማን ማሀዲ ጋር ቃለምልልስ ያደረገ ሲሆን፣ እሳቸውም በብልፅግና ፓርቲ ሀሳብ እንደማይሥማሙ በቃለ ምልልሳቸው ተናግረዋል፡፡

ቴሌቪዥን ጣቢያው ‹‹ቦተም ላይን አፍሪካ›› በሚለው ፕሮግራሙ ያቀረባቸው ዶክተሩ ሰሞኑን ወደኬንያ ስለሄዱበት ምክንያት ሲናገሩ ‹‹ኬንያ ለአፍሪካ ቀንድ ፖለቲካ ማእከል የሆነች አገር ናት፡፡ የመጣሁት በሪፍት ቫሊ ኢኒስቲትዩት በተዘጋጀው የሰላም ኮንፈረንስ ላይ ለመገኘት ነው›› ብለዋል፡፡

በኮንፈረንሱ በምስራቅ አፍሪካ ስላለው ፖለቲካና ስለተፈጠሩት የሰላም ውይይት መደረጉንም አስረድተዋል፡፡ በሶማሊ ህዝብና በኢትዮጵያ መንግስት መሀከል በኦብነግ መሪነት የተከናወነውን የሰላም ስምምነት

በማደራደር ገረድ ኬንያ የነበራትን ሚና ያስታወሱት ዶ/ር አብዱራህማን ማሀዲ ሲናገሩም ‹‹የመጨረሻው የሰላም ስምምነት በአስመራ ቢፈፀምም ኬንያም ከፍተኛ ሚና ተጫውታለች፡፡ ብለዋል፡

ስለወቅታዊ የኢትዮጵያ ሁኔታ በተጠየቁበት ወቅት ደግሞ ‹‹የወቅቱ ጠቅላይ ሚኒስትር አብይ አህመድ በጣም ታታሪ ሰው ናቸው፡፡ ለሰላም ትልቅ ራእይ ስላላቸው እስካሁን ባለው ሂደት ተሳክቶላቸዋል፡፡ ሌላው ቀርቶ ሱማሌ ክልልን ከተቀረው የኢትዮጵያ ክፍል አንፃራዊ ሰላም እንዲኖረው አድርገዋል›› በማለት ገልፀዋል፡፡

በአሁኑ ወቅት ኦብነግ እንደፓርቲ ተመዝግቦ በመጪው አገራዊ ምርጫ ለመወዳደር እየተዘጋጀ መሆኑን ያወሱት ዶ/ር አብዱራህማን ‹‹ኢትዮጵያ ለዲሞክራሲ እየተዘጋጀች በመሆኑ የተለያዩ ፓርቲዎች የመሰላቸውን አቋም የማራመድና በምርጫ የመወዳደር መብት አላቸው›› ብለዋል፡፡

ስለኢህአዲግ መፍረስና ስለብልፅግና ፓርቲ መመስረት በተጠየቁበት ወቅት የኦብነጉ ሊቀመንበር ሲመልሱ ‹‹ከብልፅግና ፓርቲ ጋር የለንበትም፡፡ ወደፊት እንደአስፈላጊነቱ ከሌሎች ፓርቲዎች ጋር ልንጣመር እንችላለን፡፡ ይሁንና እስካሁን ስለ አዲሱ ብልፅግና ፓርቲ የምናውቀው ግልፅ ነገር የለም፣ የበለጠ ማብራሪያ እንጠብቃለን፡፡ ዶ/ር አብይ ግን ዲሞክራሲዊ ተሀድሶ እንደሚያመጣ እምነት አለኝ፡፡›› በማለት ሀሳባቸውን ገልፀዋል፡፡

በፖለቲካዊ አስተሳሰብ ግን አሀዳዊ ስርአትን እንደማይደግፉ የተናገሩት ዶ/ር አብዱራህማን ማሀዲ ሲያስረዱም ‹‹አቋማችን ራስን በራስ ማስተዳደርን የሚደግፍ ነው፡፡ እያንዳንዱ ክልል የራሱ መንግስት ሊኖረው ይገባል፡፡ አላማችን በክልላችን ሆነን በትልቋ ኢትዮጵያ አጀንዳ መሳተፍ ነው፡፡›› ብለዋል፡፡

በዚሁ ቃለ ምልልስ ዶክተሩ ሲናገሩ ‹‹እንደኦብነግ አብይ ጓደኛችን ናቸው፡፡ ሙሉ በሙሉ እንደግፋቸዋለን፡፡ ስኬታቸውንም እንመኛለን፡፡ ለምስራቅ አፍሪካም ጥሩ ሰው ናቸው፡፡ በአቋም ልዩነት ሊኖረን ይችላል፡፡ አቋማችንን ይዘን በሰላማዊ መንገድ እንፎካከራለን›› በማለት ለኬንያው ቴሌቪዥን ጣቢያ በሰጡት ቃለ ምልልስ ተናግረዋል፡፡


yeahun

0 Comments

Your email address will not be published. Required fields are marked *

0Shares