በዘረፋ እና በማጭበርበር ወንጀል የተጠረጠሩ ግለሰቦች በቁጥጥር ስር ውለዋል – ፌዴራል ፖሊስ


የፌደራል ወንጀል ምርመራ ቢሮ ከአዲስ አበባ ፖሊስ ኮሚሽን ጋር በመተባበር ባደረገው ክትትል ከሐምሌ 1 2011 ዓ.ም ጀምሮ በሀገሪቱ በሚገኙት በተለያዩ የፋይናንስ ተቋማት ላይ የዘረፋ ወንጀል ፈፅመዋል የተባሉ ግለሰቦች በቁጥጥር ስር መዋላቸውን የፌዴራል ፖሊስ ገለጸ።

የአንድን የፋይናንስ ተቋም ካዝናን በፌሮ ብረት በመገንጠል ከ1 ሚሊየን 5 መቶ 23 ሺህ ብር በላይ የዘረፉትን ጨምሮ በሌሎች 3 የፋይናንስ ተቋማት ላይ ሙከራ ያደረጉት በቁጥጥር ስር ማዋሉን በፋይናንስ ተቋማት ላይ የሚፈፀሙ ወንጀሎች ምርመራ ዲቪዥን ኃላፊ ኢንስፐክተር ሳሙኤል ሰለሞን ገልፀዋል።

ከዚህ በተጨማሪ ማኅበራዊ ሚዲያን ተጠቅመው የማጭበርበር ተግባራት የፈፀሙ ግለሰቦች እንዳሉም ኢንስፔክተሩ ተናግረዋል። ግለሰቦቹ አሳሳች ቃላቶችን በመጠቀም እና ከኢትዮጵያ ውጭ እንደሚኖሩ በማስመሰል የወንጀሉ ተጎጂ ከሆኑት ሰዎች ጋር ትውውቅ ማድረጋቸው ተገልጿል።

ግለሰቦቹ ከኢትዮጵያ አየር መንገድ ስልክ እንደተደወለላቸው በማስመሰል “የተላከላችሁን ዕቃ ከአየር መንገድ ወደ ገቢዎች እና ጉሙሩክ የሚተላለፍበት ገንዘብ ያስፈልጋቸዋል” በማለት አስቀድሞ ባዘጋጁት ሐሰተኛ መታወቂያዎች እና የተለያዩ የፋይናንስ ተቋማት ሂሳብ ደብተሮች በርካታ ገንዘብ እንዲገባላቸው አድርገዋል ተብለዋል።

የማጭበርበር ተግባሩን ፈፅመዋል የተባሉት ሁለት ኢትዮጵያዊ እና አምስት በስደተኞች ካምፕ የሚኖሩ የውጭ ሀገር ዜግነት ያላቸው ግለሰቦችን ፖሊስ በቁጥጥር ስር አውሎአቸዋል።

ማንኛውም ሰው ማኅበራዊ ሚዲያን በጥንቃቄ እና በሃላፊነት ስሜት መጠቀም እንዳለበት እና ከተለያየ ተቋማት የሚሰጡ ሰነዶችም በህጋዊ መንገድ ታይተው መሰጠት እንዳለባቸው ፖሊስ መልዕክቱን አስተላልፏል።


yeahun

0 Comments

Your email address will not be published. Required fields are marked *

0Shares