በህዳሴ ግድብ ዙሪያ የኢትዮጵያ፣ ሱዳንና ግብጽ የውኃ ሚኒስትሮች እየተወያዩ ነው።


የኢትዮጵያ፣ ሱዳንና ግብጽ የውኃ ሚኒስትሮች በታላቁ የኢትዮጵያ ህዳሴ ግድብ ዙሪያ ዛሬ በአዲስ አበባ እየተወያዩ ነው። ውይይቱ የሦስቱ ሀገራት የውጭ ጉዳይ ሚኒስትሮች በአሜሪካ ጋባዥነት በዋሽንግተን ባደረጉት ውይይት በደረሱት ስምምነት መሠረት ነው እየተካሄደ የሚገኘው።

በውይይቱ ላይ የአሜሪካ እና ዓለም ባንክ ተወካዮች በታዛቢነት እየተሳተፉ ሲሆን በቀጣይ በሱዳን ካርቱም እና በግብጽ ካይሮ የሚወያዩ ይሆናል። የሚኒስትሮቹ ስብሰባ በግድቡ የውኃ አሞላል እና አስተዳድር ላይ ያተኩራል ተብሏል። በውጭ ጉዳይ ሚኒስትር አቶ ገዱ አንዳርጋቸው የተመራው የኢትዮጵያ መንግሥት ከፍተኛ የልዑካን ቡድን በአሜሪካ የገንዘብ ሚኒስትር ጋባዥነት በታላቁ የኢትዮጵያ ህዳሴ ግድብ ዙሪያ ከሱዳንና ግብጽ የውጭ ጉዳይ ሚኒስትሮች ጋር በዋሽንግተን መወያየቱ ይታወሳል።

ሚኒስትሮች በውይይታቸው የሕዳሴ ግድብን የውኃ አሞላልና ኦፕሬሽንን በተመለከተ ሁሉን አቀፍ፣ ዘላቂ እና ሁሉንም ወገን ተጠቃሚ የሚያደርግ ስምምነት ላይ ለመድረስ ቁርጠኝነታቸውን ማረጋገጣቸው ይታወሳል። በውይይታቸውም ሦስቱ ሀገራት በአውሮፓውያኑ 2015 ላይ በካርቱም የደረሱትን ስምምት ተፈፃሚ ለማድረግ ግልፅ ሂደትን ለማስቀመጥ ተስማምተዋል። በተጨማሪም በውኃ ሚኒስትሮች ደረጃ አራት ጊዜ ስብሰባዎችን ለማካሄድም ተስማምተዋል፤ በእነዚህ ስብሰባዎች አሜሪካ እና ዓለም ባንክ በታዛቢነት የሚሳተፉ ይሆናል።

እስከ አውሮፓውያኑ ጥር 15 ቀን 2020 ድረስም ስምምነት ላይ ለመድረስ የተግባቡ ሲሆን የስምምነቱን አፈፃፀም ለመገምገምና ለመደገፍ ሁለት ስብሰባዎችን በዋሽንግተን ለማከናወን ከስምምነት ደርሰዋል። ፋብኮ እንደዘገበው በመጨረሻም ሚኒስትሮቹ የዓባይ ወንዝ ለሦስቱም ሀገራት ሕዝቦች ልማት አስፈላጊ መሆኑን በማመን ድንበር ተሻጋሪ ትብብር የማድረግ አስፈላጊነት ላይ ተስማምተዋል።


yeahun

0 Comments

Your email address will not be published. Required fields are marked *

0Shares