እየተሻሻለ በሚገኘው የፀረ ሽብር ህግ በደህንነት መስሪያ ቤት ብቻ በሚቀርብ መረጃ ተጠርጣሪዎችን ለብይን የሚዳርገው አሰራር እንዲቀር መደረጉ ተገለፀ


በደህንነት መስሪያ ቤት ብቻ በሚቀርብ መረጃ ተጠርጣሪዎችን ለብይን የሚዳርገውን አሰራር በሚያስቀር አዋጅ ላይ ውይይት ተካሄደ፡፡ ከዚህ በፊት በስራ ላይ የነበረው የፀረ ሽብር ህግ አዋጅ የሰብዓዊና ዴሞክራሲያዊ መብቶችን ይጥሳል፤ መንግስት ተቃዋሚዎችን ለማሰር ተጠቅሞበታል የሚል ክስ ይቀርብበታል፡፡

ከባለፈው ዓመት ጀምሮ ሲሻሻል የቆየው ይህ ህግ በይዘትም ሆነ በአተገባበሩ ላይ በርካታ ችግሮች ሲስተዋሉበት እንደነበረ ነው የሚነገረው፡፡ ይህንንም ተከትሎ 13 አባላት ያሉት የህግ አማካሪ ጉባኤ ረቂቅ አዋጁን ሲፈትሽ ቆይቷል በተለያዩ አካላትም ጥናትና ውይይት ሲካሄድበት ነበረ፡፡

በዛሬው ዕለትም የሽብር ወንጀልን ለመከላከልና ለመቆጣጠር በተዘጋጀው ረቂቅ አዋጁ ላይ በህዝብ ተወካዮች ምክር ቤት የህግ ፍትህና ዴሞክራሲ ጉዳዮች ቋሚ ኮሚቴ ከህዝብ እና ባለድርሻ አካላት ውይይት ተደርጎበታል።

ረቂቁ ቀድሞ በነበረው የጸረ ሽብር አዋጅ ላይ በርካታ ማሻሻያዎች ተደረገውበት የተዘጋጀ ሲሆን አስፈጻሚ አካላትንም ተጠያቂ የሚያደርግ ድንጋጌ ይዟል። ረቂቅ ህጉን በተመለከተ ገለፃ ያደረጉት ምክትል ጠቅላይ ዐቃቤ ህግ ዶክተር ጌዲዮን ጢሞጢዎስ እየተሻሻለ የሚገኘው የፀረ ሽብር ህግ መሰረታዊ የህገ መንግስት መብቶችን የሚያስከብር መሆኑን ተናግረዋል፡፡

ከዚህ ባለፈም ህጉ በሀገሪቱ ላይ ያለውን የሽብርተኝነት ስጋት መቀነስ የሚያስችል እንደሆነም ገልፀዋል፡፡ ረቂቅ አዋጁ ለትርጉም ተጋላጭ እንዳይሆን መደረጉን የገለፁት ምክትል ጠቅላይ ዐቃቤ ህጉ እንደ ወንጀሉ ባህሪና መጠን ተመጣጣኝ ቅጣት ማስቀመጡን አንስተዋል፡፡

በረቂቅ አዋጁ በደህንነት መስሪያ ቤት ብቻ በሚቀርብ መረጃ ተጠርጣሪዎች ለብይን የሚዳርጉበት አሰራር እንዲቀር መደረጉም ተጠቁሟል፡፡ ረቂቅ ህጉ የተቋማትን ሃላፊነት በግልፅ ያስቀመጠ፤ አስፈፃሚ አካላት በሽብርተኝነት የተጠረጠረ አካልን በቁጥጥር ስር ሲያውሉና ሲመረምሩ ለሚፈጽሙት ስህተት ተጠያቂ የሚሆኑበት አንቀፅን ያካተተ ነው ተብሏል፡፡


yeahun

0 Comments

Your email address will not be published. Required fields are marked *

0Shares