በምዕራብ ሃረርጌ መሰላ ወረዳ በተፈጸመ ጥቃት በርካታ ቤቶች ተጎዱ።-ኢትዮ 360 ምንጮች


በምዕራብ ሃረርጌ መሰላ ወረዳ ትላንት ከሁለተኛ ደረጃና መሰናዶ ትምህርት ቤት በመጡ ተማሪዎች ተፈጸመ በተባለ ጥቃት በርካታ ቤቶች መጎዳታቸው ተገለጸ።

የሙሉጌታ አጥናፉ ቤት በእሳት እንደጋየ የሚገልጹት የኢትዮ 360 ምንጮች በለጠ ወልደ መስቀል በተባሉ ግለሰብ ቤት ላይ የተወረወረው የድንጋይ ናዳ ቤታቸውን ከጥቅም ውጪ አድርጎታል ይላሉ።

አቶ ተገኝ የሺጥላ፣ሃይሉ ዲንቃ፣ሰለሞን ሃይሉ፣የጸሃይ ጥላሁንና አስቴር ከበደ የተባሉ ግለሰቦች ከተማሪዎቹ በተወረወረባቸው ድንጋይ ክፉኛ የተጎዱ ሲሆን አቶ ፈለቀ ሰለሞን የተባሉ የልኳንዳ ቤት ባለቤትም በጥቃቱ ከባድ ግዳት እንደደረሰባቸው ምንጮቹ ገልጸዋል።

ከወለደች ገና 25 ቀናትን ያስቆጠረች እራስም በነዚህ ቡድኖች በደረሰባት ድብደባ ክፉኛ መጎዳቷ ታውቋል። ምንጮቹ እንደሚሉት በጥቃቱ ቁጥራቸው በውል ያልታወቀ ሰዎች ተጎድተው ጤና ጣቢያ ገብተዋል ብለዋል።

የአካባቢው ነዋሪ ፈርቶ በየቤቱ መደበቁ ደግሞ በአጠቃላይ ምን ያህል ሰዎች እንደተጎዱ ማወቅ አልተቻለም ይላሉ ምንጮቹ። ይሄ ሁሉ ጥቃት ሲሰነዘር የከተማው ፖሊስና አድማ በታኝ የሚባለው ሃይል ቆሞ ይመለከት እንደነበር ተናግረዋል።

የወረዳው ፖሊስ ሃላፊ ኢንስፔክተር ሶፊያን አሊ ለኢትዮ 360 እንዳሉት ችግሩ የተፈጠረው ድንገትና ባልታሰበ ሁኔታ ውስጥ ነው። ይህ ደግሞ የጸጥታ ሃይሉ የተፈጠረውን አደጋ መከላከልም ሆነ የደረሰውን አደጋ መታደግ እንዳይችል አድርጎታል ሲሉ ይናገራሉ።

አሁንም ለችግሩ መንስኤ የሆነውን ጉዳይ በማጣራት ላይ ነን ብለዋል ለኢትዮ 360። በተማሪዎቹ ደረሰ በተባለው ጥቃት ምን ያህል ሰዎች እንደተጎዱና ምን ያህል ንብረት እንደወደመ ለማወቅ ልዩ ሃይል አሰማርተን በማጣራት ላይ ነን ሲሉ ይናገራሉ።

አሁን በአካባቢው የመከላከያ ሃይል ገብቶ ሁኔታዎችን ለማረጋጋት እየሞከረ ቢሆንም ነዋሪዎቹ ግን አሁንም በስጋት ውስጥ መሆናቸውን ነው የኢትዮ 360 ምንጮች ከላኩት መረጃ ማወቅ የተቻለው።


yeahun

0 Comments

Your email address will not be published. Required fields are marked *

0Shares