አልሸባብ ፕሬዚዳንት ኦባማን በአዲስ አበባ ለመግደል አሲሮ እንደነበር ተገለጸ

ከአራት ዓመታት በፊት በአዲስ አበባ የሁለት ቀናት የሥራ ጉብኝት አድርገው የነበሩትን የቀድሞውን የአሜሪካ ፕሬዚዳንት ባራክ ኦባማ አዲስ አበባ ውስጥ ለመግደል አልሸባብ አሲሮ እንደነበር፣ በወቅቱ የፕሬዚዳንቱ ልዑክ አባልና የብሔራዊ ደኅንነት አማካሪ የነበሩት ሱዛን ራይስ ገለጹ፡፡

በፕሬዚዳንት ኦባማ የሥልጣን ዘመን የአሜሪካ የውጭ ጉዳይ ሚኒስቴር የአፍሪካ ጉዳዮች ረዳት ጸሐፊ በኋላም የፕሬዚዳንቱ የብሔራዊ ደኅንነት አማካሪ የነበሩት ሱዛን ራይስ፣ ዓርብ መስከረም 17 ቀን 2012 ዓ.ም. በተካሄደው የቴክሳስ ትሪቡን ፌስቲቫል የፖለቲካ ጉዳዮች የውይይት መድረክ ላይ ተገኝተው የፖለቲካ ሕይወት ተሞክሯቸውን ለተሳታፊዎች ሲያካፍሉ ነው ይህንን የተናገሩት፡፡

የወቅቱ ፕሬዚዳንት ባራክ ኦባማ በኬንያ የነበራቸውን ጉብኝት አጠናቀው ወደ ኢትዮጵያ መምጣታቸውን፣ አዲስ አበባ በገቡበት ቀን ምሽት ላይ የኢትዮጵያ መንግሥት ያደረገላው ኦፊሴላዊ የእራት ግብዣ ተጠናቆ ሁሉም የአሜሪካ ልዑካን ዕረፍት ለማድረግ ወደ መኝታዎቻቸው ማቅናታቸውን አስታውሰዋል፡፡

“የመኝታ ልብሴን ቀይሬ ለማረፍ እየተሰናዳሁ በነበረበት ወቅት የመኝታ ክፍሌ በር ተንኳኳ፤” ያሉት ሱዛን ራይስ፣ በሩን ያንኳኩት በወቅቱ የዋይት ሀውስ ምክትል ቺፍ ኦፍ ስታፍ የነበሩት አኒታ ዴከር እንደነበሩ ገልጸዋል፡፡

ሲዛን ራይስ የሌሊት ልብሳቸው እንደለበሱ በሩን ላንኳኩት ባልደረባቸው ቢነግሯቸውም፣ ጉዳዩ አስቸኳይ መሆኑ እንደተነገራውና እሳቸውም በሌሊት ልብሳቸው ሆነው ቺፍ ኦፍ ስታፏን ተከትለው ለእንዲህ ዓይነት ጉዞ የሚዘጋጀው ሚስጥራዊ የመረጃ ልውውጥ ድንኳን ማምራታቸውን፣ በዚያም የፕሬዚዳንቱ የጥበቃ ኃላፊና ሌሎች የሚመለከታቸው የአሜሪካ የጥበቃ ባልደረቦች ተሰብስበው እንደነበር ተናግረዋል፡፡

በዚህ ሚስጥራዊ የመረጃ ልውውጥ ድንኳን ውስጥ ከነበሩት የፕሬዚዳንቱ ጥበቃና የደኅንነት ሠራተኞች፣ ፕሬዚዳንቱን በአዲስ አበባ ጉብኝት ላይ እያሉ ለመግደል አልሸባብ የተባለው የአልቃይዳ የምሥራቅ አፍሪካ ክንፍ ማሴሩ እንደተነገራቸው ለተሰበሰቡት መግለጻቸውን አስታውሰዋል፡፡

መረጃው የመጣው ከኢትዮጵያ የደኅንነት መሥሪያ ቤት እንደነበር ያስታወሱት ሱዛን ራይስ፣ ይህንንም እንደ ሰሙ በቀጥታ ወደ ዋሽንግተን ደውለው አጠቃላይ የአሜሪካ የደኅንነት ትኩረት በተባለው የአልሸባብ ዕቅድ ላይ እንዲሆን ማድረጋቸውን ገልጸዋል፡፡

“በወቅቱ ከኢትዮጵያ የፀጥታና ደኅንነት አባላት ጋርም መረጃዎችን እየተለዋወጥን ነበር፡፡ የኢትዮጵያ የፀጥታና ደኅንነት ሠራተኞች ርህራሔ የለሽ ቢሆኑም፣ ብቁና ውጤታማ ናቸው፤” ያሉት ራይስ፣ “ተጠርጣሪው ተለይቶ ክትትል እየተደረገበት በመሆኑ አትጨነቁ እያሉ ሊያረጋጉን ይሞክሩ ነበር፤” ብለዋል፡፡

ፕሬዚዳንት ኦባማ በአፍሪካ ኅብረት የሚያደርጉትን ንግግር አጠናቀው፣ ከአፍሪካ ኅብረት ወደ ቦሌ ዓለም አቀፍ ኤርፖርት በሚያቀኑበት ወቅት ጥቃቱን ለመሰንዘር ስለመታቀዱ ከኢትዮጵያ በኩል መረጃ የደረሳቸው የፕሬዚዳንቱ ደኅንነት ሠራተኞች፣ ፕሬዚዳንቱ በአፍሪካ ኅብረት ንግግር አድርገው ከጨረሱ በኋላ በልዩ ጥበቃ ክፍል ውስጥ እንዲቆዩ ማድረጋቸውንም አያይዘው ገልጸዋል፡፡

በወቅቱ ጠቅላይ ሚኒስትር ከነበሩት አቶ ኃይለ ማሪያም ደሳለኝ ጋር በጉዳዩ ላይ እየተወያዩ እንደነበር፣ ይህ ችግር መፈታቱ እርግጠኛ መሆን እስከሚቻል ድረስ ፕሬዚዳንቱ ካሉበት ክፍል እንደማይወጡ እየነገሯቸው እንደነበርም ሱዛን ራይስ ያስታውሳሉ፡፡

የእሳቸው ባልደረባ የሆኑትና በኢትዮጵያ ለበርካታ ዓመታት የኖሩት ጌል ስሚዝ ደግሞ፣ ከኢትዮጵያ የደኅንነት ኃላፊ ከነበሩት (አቶ ጌታቸው አሰፋ) ጋር በስልክ መረጃ እየተለዋወጡ እንደነበር ያስታወሱት ሱዛን፣ “እኛ ተጨንቀን ችግር ውስጥ መሆናችንን የምንነግረው የኢትዮጵያ ደኅንነት ኃላፊ፣ ምንም ችግር የለም አትጨነቁ ይለን ነበር፡፡ እንዴት ችግር የለም ብሎ ባልደረባቸው ሲጠይቃቸውም ተጠርጣሪው መያዙንና በቦሌ ኤርፖርት በእሳቸው (በደኅንነት ኃላፊው) መኪና ውስጥ አብሯቸው እንደሚገኝ” እንደነገሯቸው አክለው ገልጸዋል፡፡

በፕሬዚዳንቱ ላይ ሊቃጣ የነበረውን ግድያ የአሜሪካ ደኅንነት ተቋማትም እየተከታተሉት እንደነበር፣ ከዚያም የተገኘው መረጃ ተጠርጣሪዎቹ በአፍሪካ ኅብረት ወደ አየር ኤርፖርት በሚወስድ መንገድ በየትኛውም ቦታ ላይ ከሕዝብ ጋር ተቀላቅለው ሊሆን እንደሚችል የሚያስረዳ እንደነበር ያስታወሱት ሱዛን ራይስ፣ በኋላ ተጠርጣሪው በቦሌ ኤርፖርት ስለመያዙ ከኢትዮጵያ በኩል ከተነገረ በኋላ፣ ከአሜሪካም ፕሬዚዳንቱን ወደ ኤርፖርት መውሰድ እንደሚቻል ትዕዛዝ መተላለፉን አስረድተዋል፡፡

አስፈሪና አስጨናቂ ገጠመኝ የነበረ ቢሆንም፣ በሰላም ከአዲስ አበባ መውጣታቸውን አስታውሰዋል፡፡ ሪፖርተር

Leave a Reply

Your email address will not be published. Required fields are marked *