ኢትዮጵያ የኒውክለር ቴክኖሎጂን ለሃይል ምንጭነት መጠቀም የሚያስችላትን ተጨማሪ ፕሮቶኮል ፈረመች


በኦስትሪያ ቪዬና በመካሄድ ላይ ባለው 63ኛው የአለም አቀፍ የአቶሚክ ኢነርጂ ኤጄንሲ ዓመታዊ ጉባኤ ላይ ኢትዮጵያ የኒውክለር ቴክኖሎጂን የኤሌክትሪክ ሀይልን ጨምሮ ለማናቸውም የሰላማዊ ጥቅም ለመጠቀም የሚያስችላትንና ለአለም አቀፉ ማህበረሰብ ፕሮግራሞቿን ሁሉ በግልፀኝነት ለማከናውን ፈቃደኝነቷን ያረጋገጠችበትን ወሳኝ የሚባል የተጫማሪ ፕሮቶኮል ፈርማለች።

ይህ ፕሮቶኮል ሀገሪቱ ከዚህ በፊት የፈረመቻቸውን ሌሎች ስምምነቶች ለማጠናከር በኤጄንሲው የወጣ ተጨማሪ የግልፀኝነት ግዴታዎችን የሚያስቀምጥ ነው። የኢኖቬሽንና ቴክኖሎጂ ሚኒስትር ጌታሁን መኩሪያ ከኤጄንሲው ተጠባባቂ ዋና ዳይሬክተር ሚስተር ኮርኔል ጋር ስምምነቱን ፈርመዋል።

ሚኒስትሩ ሀገራቸው ኒውክለርን ለማናቸውም ሰላማዊ ጥቅም በተለይም ለጤና፣ ለግብርና፣ ለኢንዱስትሪ እና የኤሌክትሪክ ሀይልን ለማመንጨት ጭምር ለመጠቀም ዕቅድ እንዳላትና በዚህ ዘርፍ ኤጄንሲው ከሀገራቸው የሚጠብቀውን ግልፀኝነት ለማረጋገጥ እንዲቻል መንግስት የተጨማሪ ፕሮቶኮል ሰነዱ እንዲፈረም መወሰኑን አስታውቀዋል።

የዘላቂ ዕድገት ግቦችን ያለ ቴክኖሎጂ ተጠቃሚነት ማሳካት አይቻልም ያሉት ሚንስትሩ ይህም ኒውክለር ቴክኖሎጂንም ያካትታል ብለዋል።

በዚሁ በ63ኛው የአለም አቀፍ የአቶሚክ ኤጄንሲ ዓመታዊ ጉባኤ ላይ ሀገራቸውን ወክለው ንግግር ያደረጉት ሚኒስትሩ ሀገራቸው በአፍሪካ ፈጣን ዕድገት እያስመዘገቡ ከሚገኙ ሀገራት ቀዳሚውን ስፍራ እንደምትይዝ ጠቅሰው እ.ኤ.አ በ2025 መካከለኛ ገቢ ኢኮኖሚ ለመሆን ጠንክራ እየሰራች መሆኗን ገለፀዋል።

በተጨማሪም ሀገራቸው ኢትዮጵያ በአሁኑ ወቅት እያካሄዴች ያለችውን የፖለቲካና የኢኮኖሚ ሪፎርሞችን፣ እንዲሁም ጠቅላይ ሚንስትር አብይ አህመድ የጀመሯቸው ሪፎርሞች ለኢትዮጵያ ብቻ ሳይሆን ለሁሉም የአፍሪካ ቀንድ ሀገራት መካከል ከማናቸውም ጊዜ የበለጠ የሰላም፣ የወንድማማችነትና የመተማመን ሁኔታ መኖሩን አስታውቀዋል።

ከሚኒስቴሩ ያገኘነው መረጃ እንደሚያመለክተው በማናቸውም መንገድ አለማችንን ከኒውክለር ስጋት ለማስወገድ ኤጄንሲው ለሚያወጣቸው ማናቸውም ፕሮቶኮሎች ሀገራቸው ኢትዮጵያ ጠንክራ አንደምትሰራ አረጋግጠዋል። የተጨማሪ ፕሮቶኮሉ መፈረም ኢትዮጵያ በዘርፉ ያላትን ተጠቃሚነቷን የሚያረጋግጥላት ወሳኝ ስምምነት ነው።

ENA


yeahun

0 Comments

Your email address will not be published. Required fields are marked *

0Shares