በህገ ወጥ መንገድ ለገበያ ሊያቀርቡ የነበሩ አትክልት፣ ፍራፍሬዎች እና ልዩ ልዩ የምግብ ግብዓቶችን የጫኑ 25 አይሱዙ የጭነት ተሽከርካሪዎች በቁጥጥር ስር ዋሉ


በአዲስ አበባ ፖሊስ ኮሚሽን የአራዳ ክፍለ ከተማ ፖሊስ መምሪያ ከባለድርሻ አካላት ጋር በመቀናጀት ባደረገው ድንገተኛ ቁጥጥር በህገ ወጥ መንገድ ለገበያ ሊቀርቡ የነበሩ የተለያዩ አትክልት እና ፍራፍሬዎችን እንዲሁም ልዩ ልዩ የምግብ ግብዓቶችን የጫኑ 25 አይሱዙ የጭነት ተሽከርካሪዎችን መያዙን አስታወቀ ፡፡

መስከረም 7 ቀን 2012 ዓ/ም በአራዳ ክፍለ ከተማ ፖሊስ መምሪያ በወረዳ 1 እና 2 ልዩ ቦታው ፒያሳ አትክልት ተራ ተብሎ በሚጠራው አካባቢ ከንግድና ኢንዱስትሪ ቢሮ ፤ ከደንብ ማስከበር አገልግሎት ፅ/ቤት እና ከሌሎች ባለድርሻ አካላት ጋር በመቀናጀት የተለያዩ አትክልት እና ፍራፍሬዎችን እንዲሁም ልዩ ልዩ የምግብ ግብዓቶችን ወደ ገበያ ይዞ በመግባት ያለደረሰኝ እና ያለ ንግድ ፈቃድ በመሸጥ ከህጋዊ የንግድ ስርዓት ውጪ የዋጋ ንረት እንዲከሰት ለማድረግ በሞከሩ አካላት ላይ ድንገተኛ ቁጥጥር በማድረግ እርምጃ እንዲወሰድ ማድረጉን የአዲስ አበባ ፖሊስ ኮሚሽን አስታውቋል፡፡

በእለቱ የተለያዩ አትክልቶች ፤ፍራፍሬዎች እና ልዩ ልዩ የምግብ ግብዓቶችን የጫኑ 25 አይሱዙ የጭነት ተሸከርካሪዎች የተያዙ ሲሆን ተጭነው የተገኙት ንብረቶችም ህጋዊ ስርዓቱን ጠብቆ ለህብረተሰቡ በተመጣጣኝ ዋጋ እንደሚሸጡ በአራዳ ክ/ከተማ የወረዳ 7 ዋና ስራ አስፈፃሚ አቶ አለማየሁ አራጋው ገልፀዋል፡፡

ህገ ወጥነትን መከላከልና መቆጣጠር ለፖሊስ ብቻ የሚተው ኃላፊነት ሳይሆን የሁሉም ህብረተሰብ ድርሻ በመሆኑ በዚህ ዙሪያ አስፈላጊውን መረጃ ለፀጥታ አካላት በመስጠት ትብብር ማድረግ እንዳለበት የአራዳ ክ/ከተማ የደንብ ማስከበር አገልግሎት ጽ/ቤት የመረጃ ባለሙያ ወ/ሮ ሃናማሪያም ሙሉጌታ አሳስበዋል፡፡

በዚህና በሌሎች ተያያዥ ጉዳዮች ላይ ዛሬ መስከረም 8 ቀን 2012 ዓ/ም በአዲስ አበባ ከተማ አስተዳደር በምክትል ከንቲባ ማዕረግ የማህበራዊ ዘርፍ አስተባባሪና የንግድና እንዱስትሪ ልማት ቢሮ ኃላፊ ኢንጅነር እንዳወቅ አብቴ መግለጫ ሰጥተዋል ፡፡ የግብይት ሰንሰለቱ በህገ ወጥ ደላሎች መያዝና አቅርቦትና ፍላጎት አለመመጣጠን በአዲስ አበባ ለሚታዩ የሸቀጦች የዋጋ ጭማሪ ዋነኛ ምክንያት መሆናቸውን በመግለጫቸው አንስተዋል፡፡


yeahun

0 Comments

Your email address will not be published. Required fields are marked *

0Shares