Wed. Jan 27th, 2021

Ethiopian Intercept

We Share News

ጎንደር “ጥምቀትን አብረን እናክብር” ግብዣ ለኤርትራ አቀረበች

በጎንደር በድምቀት ለሚከበረው የጥምቀት በዓል ለአስመራ ህዝብ ጥሪ መተላለፉን የጎንደር ከተማ አስተዳደር ባህል ቱሪዝምና ስፖርት መመሪያ አስታወቀ። የጥምቀት በዓል በጎንደር ከተማ በልዩ ድምቀት ይከበራል። ለዚህም ምክንያቱ ጎንደር የ44ቱ ታቦታት መገኛ፣ የነገሥታት መናገሻ፣ ታሪካዊ እና የአፄ ፋሲለደስ የባህር ጥምቀት ገንዳም መገኛ በመሆኗ ነው።

በመሆኑም ጎንደር ከአስመራ ህዝብ ጋር የነበራትን ጥንታዊ የጠበቀ ግንኙነት ለማስቀጠልና አብሮነትን ለማጠናከር አስመራ በዚህ በዓል እንድትታደም መጋበዟን ከከተማ አስተዳደሩ ባህል ቱሪዝም ስፖርት መመሪያ የተገኘው መረጃ ያመለክታል።

ባህረ ጥምቀቱን ምክንያት በማድረግ ወደ ጎንደር የሚሄዱ እንግዶችም በቦታው ሲገኙ ከሃይማኖታዊ ክዋኔ በተጨማሪ የጎንደርን ጥንታዊ፣ ታሪካዊ እና ባህላዊ ቅርሶችን እንዲጎበኙ ዝግጅት ተደርጓል። ለዚህም እንግዳ አክባሪው፣ ፍጹም ኢትዮጵያዊነት እሳቤ እና አመለካከት ያለው የጎንደር ህዝብ እንግዶችን ለመቀበል ቅድም ዝግጀት ማጠናቀቁን ነው መምሪያው ያስታወቀው።

ባህረ ጥምቀቱን ለማክበር ሲደረግ የነበረው ሰፊ ዝግጅት መጠናቀቁን የጎንደር ከተማ ባህል ቱሪዝምና ስፖርት መመሪያ አስታወቋል። በመመሪያው የባህል ዕሴቶች እና ኢንዱስትሪ ልማት ቡድን መሪ ልዕልና ገብረ መስቀል እንዳሉት ለጥምቀት በዓል የቅድመ ዝግጅት ሥራ ሲከናወን ቆይቷል።

አቶ ልዕልና እንደሚሉት ከጥቅምት በዓል አከባበር አንዱና ዋነኛው ፋይዳ ማኀበራዊ ትስስርን ማጠናከር ነው። የዘንድሮ የጥምቀት በዓል በአዋሳኝ አካባቢ የሚገኙ እና የአስመራ ህዝቦችን በማሰባሰብ የቀደመ ጠንካራ የታሪክና የበዓል ግንኙነታቸውን ለመመለስ ቅድመ ዝግጅት መደረጉን ተናግረዋል።

ቀድሞ የነበረው ጠንካራ ግንኝነት በሴረኛው ትህነግ ከተቋረጠ በኃላ የአስመራ ህዝብ ለጥምቀት በጎንደር እንዲገኝ የተላለፈ የመጀመሪያው ጥሪ መሆኑን የተናገሩት ቡድን መሪው ጥሪውም የነበረውን የቀደመ ግንኙነት የበለጠ ለማጠናከር ታሳቢ ያደረገ ነው ብለዋል።

የጋራ ባህል ያላቸው ሁለቱ ህዝቦች የጥምቀት በዓልን በጋራ ማክበራቸው በቀጣናው ሰላም እና መረጋጋት እንዲሰፍን፣ የአንድነት ስሜት እንዲጠናከር እና በትውልዱ ዘንድ የማይበጠስ ትስስር ለመፍጠር ያስችላል ብለዋል።

የጥምቀት በዓል ለጎንደር እና አካባቢው ማኀበረሰብ ልዩ ድምቀት አለው ያሉት አቶ ልዕልና የበዓሉን ሃይማኖታዊ እና ባህላዊ ትውፊት ለመዘከር የአካባቢውን ባህልና ወግ የሚያስተዋወቁ ወጣቶች ፣ ጥበባዊ ሥራዎችን የሚያቀርቡ ባለሙያዎች፣ ኢግዚቢሽንና ልዩ ልዩ ሁነቶች መዘጋጀታቸውን ተናግረዋል። በዓሉ ጥሪ ለተደረገለት የአስመራ ህዝብም ደማቅ አቀባበል እንደሚደረግ ታወቋል።

Subscribe To Our Newsletter

[mc4wp_form id="318"]