Press "Enter" to skip to content

ጀማይካዊው የአማርኛ መምህር

“አማርኛ ከእንግሊዝኛ በበለጠ ለሰው የቀረበ ቋንቋ ነው። ለምሳሌ ከወንድ ጋር ስታወሩ ዓረፍተ ነገሩ ወንድን የሚያመለክት ነው። ከሴት ጋር ስታዋሩም እንደዚያው። ቋንቋው ለትልቅ ሰዎችም ክብር እንድንሰጥ ያስችለናል።”

~ስቲቨን ዶኖቫን

ስቲቨን ዶኖቫን ሉዊስ ይባላል።
የጀማይካ ዋና ከተማ ከሆነችው ኪንግስተን ወደ ኢትዮጵያ የመጣው ከዛሬ አስር ዓመት በፊት ነበር። ወደዚህ ካመጡኝ ጉዳዮች መካከል አንዱ እምነቴ ነው። ከተመረጡት የአብርሃም ልጆች መካከል አንዱ በሆኑት በንጉስ ኃይለ ሥላሴ ውስጥ አንድ ነገር በማየቴ ነው ይላል ለቢቢሲ በሰጠው መግለጫ።

ከእምነቴ በተጨማሪ ወደ ኢትዮጵያ ያመጣኝ ሌለው ነገር አማርኛ ቋንቋ ለመማር ያለኝ ጥልቅ ፍላጎት ነው። ወደ ኢትዮጵያ ስመጣ ቋንቋውን የመማር ዕድል እንደማገኝ ትልቅ ተስፋ ነበረኝ። ቋንቋውን አቀላጥፌ ለመናገር ብዙ ጥረት እያደረግኩ ነው። በቅድሚያ አዲስ አበባ ከዚያ ቀጥሎ ደግሞ ባህር ዳር ሄጄ ተምሬያለሁ።

በኢትዮጵያ የሚገኙ ራስ- ተፈሪያውያን አማርኛ ቋንቋን መማር እንዳለባቸው ይሰማኛል። ይህን ለመደገፍ የአማርኛ ቋንቋ መማር የሚፈልጉትን ፊደል እያስቆጠርኩ ነው። እስካሁን ድረስ አስራ አምስት ተማሪዎችን አስተምሬያለሁ። አማርኛ ከእንግሊዝኛ በበለጠ ለሰው የቀረበ ቋንቋ ነው። ለምሳሌ ከወንድ ጋር ስታወሩ ዓረፍተ ነገሩ ወንድን የሚያመለክት ነው። ከሴት ጋር ስታዋሩም እንደዚያው። ቋንቋው ለትልቅ ሰዎችም ክብር እንድንሰጥ ያስችለናል። በእነዚህ ምክንያቶች አማርኛ ብልህ ቋንቋ እንደሆነ ይሰማኛል። ወንድ እና ሴት አብረው ቆመው ቢሆንና ለአንዳቸው ብቻ ሰላምታ መስጠት ቢያስፈልግ ያንን ማድረግ ይቻላል። ለሁለቱም ሰላምታ ማቅረብ ካስፈለገም እንደዚያው ማድረግ ያስችላል።

ለእኔ አማርኛን መማር ወደ ሰው ልብ በዚያውም ወደ አምላክ እንደመቅረብ ነው። ግዕዝም በጣም አስፈላጊ እንደሆነ አውቃለሁ። ምናልባትም ወደፊት ግዕዝ መማሬ አይቀርም። እንግሊዝኛ ግን እንደዚያ አይደለም። በእንግሊዝኛ ‘ሰላም’ ማለት በቃ ‘ሰላም’ ብቻ ነው። የሀገሬ ይፋዊ የሥራ ቋንቋ እንግሊዝኛ ቢሆንም ለኔ ግን እንግሊዝኛ የኔ ቋንቋ እንደሆነ አይሰማኝም። ለእኔ እንግሊዝኛ የአባቶቼ ቋንቋ አይደለም። አባቶቼ አፍሪካዊያን ናቸው።

እንግሊዝኛ የሚነገርበት ሀገር ረጅም ዓመት ስለኖርኩ የማንነቴን ቋንቋ አጥቼ ነበር። አሁን ግን ተመልሼ መጥቼ አማርኛ ተማርኩ። አማርኛ በመማሬም በጣም ደስተኛ ነኝ፤ ምክንያቱም ቋንቋውን ማወቄ ኃይማኖቴን የበለጠ እንድገነዘበው ይረዳኛል።

አንድ ኢትዮጵያዊ አሁን ወደ ጃማይካ ቢሄድ ስለ ሥራ ምንም ጭንቀት አይገባውም፤ አስተማሪ መሆን ብቻ ይበቃዋል። አማርኛ የመማር ፍላጎት ያላቸው በጣም ብዙ ሰዎች አሉ። ከአሁን በኋላ ወደ ጃማይካ ተመልሶ የመሄድ ፍላጎት የለኝም። ይልቁንም ተጨማሪ ጃማይካውያን ወደዚህ እንዲመጡ ነው የምፈልገው።
[ምንጭ- ታዛ]

Be First to Comment

Leave a Reply

Your email address will not be published. Required fields are marked *