Press "Enter" to skip to content

የሲኖዱስ ጉባኤ ባለ15 ነጥብ መግለጫ በማውጣት ተጠናቀቀ

ከጊዜ ወደ ጊዜ እየተባባሰ የመጣውን ግፍ ለመግታት እና ፀራውያንን ለመቋቋም፣ ቤተ ክርስቲያን ልጆችዋን አስተባብራ እና አደራጅታ ራስዋን በራስ ወደ መጠበቅ እንድትሸጋገር፣ ብፁዕ ወቅዱስ ፓትርያርክ አቡነ ማትያስ ለአቀረቡት ማሳሰቢያ የጋለ ድጋፉን የሰጠው የመንበረ ፓትርያርክ አጠቃላይ ሰበካ መንፈሳዊ ጉባኤ፣ መላ አገልጋዮች እና ምእመናን ራሳቸውን እንዲያዘጋጁ ጥሪ አቀረበ፡፡

አጠቃላይ ሰበካ መንፈሳዊ ጉባኤው፣ ካለፈው ማክሰኞ ጥቅምት 3 ቀን ጀምሮ ሲያካሒድ የቆየውን 39ኛ ዓመታዊ ስብሰባውን ዛሬ ቀትር ላይ፣ ባለ15 ነጥቦች የጋራ መግለጫ በማውጣት ያጠናቀቀ ሲኾን፣ “ቅዱስ ፓትርያርኩ ባስተላለፉት መልእክት፣ ቤተ ክርስቲያናችንን ለማዳን ራሳችንን እናዘጋጅ፤” በማለት፣ ራስን በራስ ለመጠበቅ እና ለመከላከል ለተላለፈው ፓትርያርካዊ ጥሪ ድጋፉንና ዝግጁነቱን አስታውቋል፡፡

ቅዱስ ፓትርያርኩ፣ በአጠቃላይ ጉባኤው መክፈቻ ላይ፣ “ወይኩን ቅኑተ ሐቌክሙ ወኅትወ መኃትዊክሙ = ወገባችኹ የታጠቀ፣ መብራታችኹም የበራ ይኹን፤”(ሉቃ. 12፥35) በሚለው መሪ ቃል ባስተላለፉት መልእክት፤ ኦርቶዶክሳውያን በማንነታቸው ብቻ እየደረሰባቸው ያለው ማቆሚያ የሌለው ጥቃት እና እየተባባሰ የመጣ ግፍ፣ ለቤተ ክርስቲያን ጠቅላላ ህልውና እጅግ አስጊ እየኾነ መምጣቱን አስገንዝበዋል፡፡ ምእመናን፥ በማንነታቸው ተሸማቅቀው፣ ነፃነታቸው ተገፎ፣ በአገራቸው እና በወገናቸው መካከል የመኖር እና ሃይማኖታቸውን የመከተል መብት አጥተው ባሉበት ኹኔታ፣ ቤተ ክርስቲያንን እየጠበቅን ነው፤ ለማለት ስለማይቻል፣ በአንድነት ተባብሮ እና ተደራጅቶ ምንጊዜም የማይተኙትን አፅራር መቋቋም ብሎ ራስን በራስ ወደ መጠበቅ አማራጭ መሸጋገር እንደሚያስፈልግ ቅዱስነታቸው አሳስበዋል፡፡

ይኸው የርእሰ መንበሩ መልእክት፣ የአጠቃላይ ጉባኤው የጋራ መግለጫ መግቢያ እና መደምደሚያ ኾኖ በንባብ በተሰማበት ወቅት፣ ከ731 በላይ የኾኑ የሀገር ውስጥ እና የውጭ አህጉረ ስብከት ተሳታፊ ልኡካን፣ የጋለ ድጋፋቸውን በጭብጨባ ገልጸዋል፡፡ መላው አገልጋዮች እና ምእመናንም፣ ማሳሰቢያውን ተግባራዊ በማድረግ ቤተ ክርስቲያንን ለማዳን ራሳቸውን እንዲያዘጋጁ፣ አጠቃላይ ጉባኤው በጋራ መግለጫው ጥሪ አስተላልፏል፡፡

በሌላ በኩል አጠቃላይ ጉባኤው፣ ቅዱስ ሲኖዶስ፣ ከመጪው ጥቅምት 12 ቀን አንሥቶ በሚያካሒደው የመጀመሪያ ዓመታዊ የምልአተ ጉባኤ ስብሰባው፣ ውሳኔ ሊያሳልፍባቸው ይገባል ያላቸውን ጉዳዮች በጋራ መግለጫው አካትቶ አቅርቧል፡፡ በቤተ ክርስቲያን ላይ እየደረሰ ያለውን በደል እና ጥቃት አስመልክቶ፣ ቅዱስ ሲኖዶስ ጠንካራ ውይይት እንዲያደርግ፣ ግፉንና መከራውንም ከመሠረቱ ለማስቆም የሚያስችል ውሳኔ እንዲያሳልፍ አጠቃላይ ጉባኤው በአጽንዖት ጠይቋል፡፡

መንግሥት የሕግ ማስከበር ሓላፊነቱን አጠናክሮ በአግባቡ እንዲወጣ በማሳሰብ፣ ባለፈው ዓመት በተለይ በኦሮሚያ ክልል አንዳንድ ዞኖች፣ ማንነትን ማዕከል በማድረግ በተፈጸሙ ጥቃቶች የተጎዱትን ምእመናን፥ መልሶ እንዲያቋቁም፣ እንዲክስ እና ጥፋተኞችን ለሕግ አቅርቦ እስከ መጨረሻውን ፍትሕ ርትዕ ማስፈኑን እንዲቀጥል ጠይቋል፡፡

የአስቸኳይ ዐዋጁ ገደቦች ከተነሡ በኋላ እና የኮሮና ወረርሺኝን ሰበብ በማድረግ፣ ኾነ ተብሎ አክብሮ በዓላትን የማስታጎል አድሏዊ አሠራሮች እና ርምጃዎች በመንግሥት አካላት በኩል እየታዩ እንደኾነ በጋራ መግለጫው የጠቀሰው አጠቃላይ ጉባኤው፣ በመስቀል ደመራ በዓል አከባበር እና በዛሬው የጻድቁ አቡነ ገብረ መንፈስ ቅዱስ ክብረ በዓል፥ ይዞታዎችን በመቀማት እና የተሳላሚ ምእመናንን በማስተጓጎል የተፈጠሩ ችግሮችን በማሳያነት ጠቅሷል፡፡ ይህ አካሔድ፣ የቤተ ክርስቲያናችንን ሥርዐተ አምልኮ በማስተጓጎል ለወደፊቱም ጨርሶ እንዲቀር የማድረግ ዓላማ ያለው ነው፤ ብሏል፡፡

በመኾኑም፣ ወረርሺኙን መከላከልን ያገናዘበ፣ ለኹሉም በእኩልነት የሚተገበር ወጥ አሠራር እንዲዘረጋ መንግሥትን አሳስቧል፡፡ ቅዱስ ሲኖዶስም፣ የመስቀል ደመራ በዓል አከባበር እንዲታጎል ምክንያት የኾኑ አካላት በሕግ ተጠያቂ እንዲያደርግ፣ የበዓሉ ማክበርያ ዐደባባዮችም እንዲመለሱ እንዲያደርግ በመግለጫው ጠይቋል፡፡ ምንጭ ሀራ ተዋህዶ

Be First to Comment

Leave a Reply

Your email address will not be published. Required fields are marked *