Press "Enter" to skip to content

ቤተክርስትያን ልጆችዋን አስተባብራ እና አደራጅታ ራስዋን ወደ መጠበቅ እንድትሸጋገር ቅዱስ ፓትርያርኩ አሳሰቡ

በየዓመቱ ጥቅምት ወር መጀመሪያ ላይ የሚካሔደው፣ የመንበረ ፓትርያርክ አጠቃላይ ሰበካ መንፈሳዊ ጉባኤ፣ 39ኛ ዓመታዊ እና ዓለም አቀፋዊ ስብሰባውን ዛሬ ማክሰኞ፣ ጥቅምት 3 ቀን 2013 ረፋድ ማካሔድ ጀምሯል፡፡

ዐዲስ በተገነባው እና “ጽርሐ ተዋሕዶ” ተብሎ በተሰየመው አዳራሽ በጸሎተ ወንጌል በተጀመረው በዚኹ ዓመታዊ አጠቃላይ ጉባኤ መክፈቻ ላይ፣ “ወይኩን ቅኑተ ሐቈክሙ ወኅትወ መኃትዊክሙ፤ ወገባችኹ የታጠቀ፣ መብራታችኹም የበራ ይኹን፤”(ሉቃ. 12፥35)በሚል ርእስ መልእክት ያስተላለፉት ርእሰ መንበሩ ብፁዕ ወቅዱስ ፓትርያርክ አቡነ ማትያስ፥ ቤተ ክርስቲያንን ከገጸ ምድር ለማጥፋት በየአቅጣጫው የተነሡ ኃይሎች በተበራከቱበት እና የሚፈጽሙባትም ግፍ እየተባባሰ በመጣበት በአሁኑ ጊዜ፣ ጥቃቱን ለመመከት እና መከራውን ለመግታት፣ መላውን አገልጋዮች እና ምእመናን አስተባብሮ እና አደራጅቶ ራስን ወደ መጠበቅ አማራጭ መሸጋገር እንደሚያስፈልግ አስገንዝበዋል፤ ጉባኤውም ተገቢውን መፍትሔ እንዲያስቀምጥ ኣሳስበዋል፡፡
፠፠፠

“… በአሁኑ ጊዜ፣ በቤተ ክርስቲያናችን ላይ እየደረሰ ካለው መከራ አንጻር፣ ከምንም ጊዜ በላይ ታጥቀን ለቤተ ክርስቲያን ህልውና መቀጠል እና ለሕዝበ ክርስቲያኑ የሕይወት ዋስትና መረጋገጥ በአንድነት የምንቆምበት ጊዜ ነው፡፡

ለሦስት ሺሕ ዘመናት አገርን የገነባች እና የጠበቀች፣ ኹሉንም በእኩልነት ያስተናገደች፣ በማንም ላይ ግፍን ያልፈጸመች ቤተ ክርስቲያናችን፣ ዛሬ፥ “ከገጸ ምድር እናጥፋሽ” የሚሉ በምሥራቅም በምዕራብም እየጠበራከቱ መጥተዋል፡፡ ከዛሬ ነገ ይሻል ይኾናል፤ ፍትሕም እናገኝ ይኾናል፤ እያልን በተስፋ ብንጠባበቅም ሲኾን አናይም፤ ይልቁንም ከጊዜ ወደ ጊዜ ነገሩ እየተባባሰ፣ ክርስቲያን ልጆቻችንም ለተደጋጋሚ ጥቃት እየተዳረጉ በክርስቲያንነታቸው ብቻ የግፍ ግፍ እየተፈጸመባቸው ይገኛሉ፡፡ ቤተ ክርስቲያናችን፣ በተለያዩ ጊዜያት ባደረገችው ጥሪ፣ ከልዩ ልዩ በጎ አድራጊዎች እና ከሕዝበ ክርስቲያኑ፣ ለተጎዱ ምእመናን የተወሰነ ድጋፍ ለማድረግ ቢሞከርም፣ ከችግሩ ስፋት የተነሣ የሚያረካ አልኾነም፡፡

አበው ሲናገሩ፣ “ከራስ በላይ ነፋስ” እንደሚሉት፣ ቤተ ክርስቲያናችን እየገጠማት ያለውን ችግር ለመቋቋም፣ ልጆችዋን አስተባብራ እና አደራጅታ ራስዋን ወደ መጠበቅ አማራጭ ካልተሸጋገረች፣ ዕጣ ፈንታዋ እጅግ አስጊ እየኾነ መጥቶአል፤ ክርስቲያን ልጆቻችን ተሸማቅቀው፣ ነፃነታቸው ተገፎ፣ በአገራቸው እና በወገናቸው መካከል የመኖር እና ሃይማኖታቸውን የመከተል መብት አጥተው ባሉበት ኹኔታ፣ ቤተ ክርስቲያንን እየጠበቅን ነው ማለት አይቻልም፡፡

ስለኾነም፣ ሕዝበ ክርስቲያንን የመጠበቅ እና የማጽናናት ሓላፊነት ከኹሉ በፊት በቅዱስ ሲኖዶስ ጫንቃ ላይ ያረፈ እንደመኾኑ መጠኝ፣ በኢትዮጵያ ኦርቶዶክስ ተዋሕዶ ቤተ ክርስቲያን ላይ የሚዘንበውን መከራ ለመግታት፣ ቅዱስ ሲኖዶስ በዚኽ ጉባኤ ተገቢውን መፍትሔ ማስቀመጥ ይጠበቅበታል፡፡” ምንጭ ሀራ ተዋህዶ

Be First to Comment

Leave a Reply

Your email address will not be published. Required fields are marked *