Press "Enter" to skip to content

“ዶላሩ በመቅረቱ ከጉዳቱ ይልቅ ጠቀሜታው ያመዝንብኛል።” ዶክተር አረጋ ሹመቴ

በአሜሪካ የኢትዮጵያ አምባሳደር ፍጹም አረጋ አሜሪካ ለኢትዮጵያ የመደበችው 130 ሚሊዮን የአሜሪካን ዶላር እንዳይሰጥ መወሰኗን በትዊተር ገፃቸው አሳውቀዋል፡፡ ጉዳዩ በኢትዮጵያ ሕዝብ ገንዘብ እየተገነባ ካለው ከታላቁ ሕዳሴ ግድብ ጋር እንደሚያያዝም አምባሳደሩ ጠቅሰዋል፡፡

ከሚመለከታቸው የአሜሪካ ባለስልጣናት ጋር ምክክር ከተካሄደ በኋላም ገንዘቡ እንዳይሰጥ የተወሰነው በጊዜያዊነት እንዲቆይ (Temporary pause) ለማድረግ መሆኑን በማኅበራዊ ገፃቸው ላይ ጽፈዋል፡፡

አብመድም የአሜሪካ የገንዘብ ድጋፍ መዘግየቱ ወይም መቋረጡ አንደምታው ምን ይሆን? የሚያመጣው ተፅዕኖስ? ሲል በደብረ ማርቆስ ዩኒቨርሲቲ የምጣኔ ሃብት መምህሩ ዶክተር አረጋ ሹምቴን ጠይቋል፡፡ ጉዳዩ ከማኅበራዊ ጫናው ይልቅ ፖለቲካዊና ምጣኔ ሃብታዊ ተፅዕኖው የበለጠ እንደሆነ ዶክተር አረጋ ተናግረዋል፡፡

በምጣኔ ሃብታዊ ጠቀሜታው ገንዘቡ ቢገኝ ኖሮ በኢትዮጵያ የተጀመሩ ፕሮጀክቶችን ለመደገፍና ለማስጨረስ መዋል እንደሚችል ጠቁመዋል፡፡ በፖለቲካዊ ጠቀሜታው ደግሞ የሁለቱን ሀገራት ግንኙነት በማስቀጠልና ወደ ተሻለ ደረጃ በማሸጋገር ሚናው የጎላ መሆኑን ምሁሩ ተናግረዋል፡፡

በአንፃሩ ግን ጉዳዩ በቀጣይነት የምናገኘውን ጥቅም የሚያስቀር ዓይነት መሣሪያ ወይም መንገድ መሆን እንደሌለበት አስገንዝበዋል፡፡ ለአብነት በ2012 ዓ.ም ወደ ውጭ ሀገራት ከተሸጠው የኤሌክትሪክ ኃይል አገልግሎት የተገኘው የገንዘብ ምንዛሬ አሁን አሜሪካ በእርዳታ መልኩ ትሰጣለች ከተባለው የበለጠ መሆኑን አመላክተዋል። በዘንድሮ ዓመት ለጎረቤት ሀገራት ለሱዳን 568 ነጥብ 6 ጌጋ ዋት ሰዓት እና ለጅቡቲ 579 ነጥብ 4 ጌጋ ዋት ሰዓት የኤሌክትሪክ ኃይል ሽያጭ ቀርቦ 66 ነጥብ 4 ሚሊዮን የአሜሪካን ዶላር መገኘቱን ከኢትዮጵያ ኤሌክትሪክ ኃይል አገልግሎት ኮሙዩኒኬሽን ዳይሬክቶሬት ያገኘነው መረጃ አመላክቷል፡፡ በዕቅድ 57 ሚሊዮን ዶላር ለመሰብሰብ ከታሰበው ጋር ሲነፃፀር የ16 ነጥብ 5 በመቶ ብልጫ እንዳለው የኢትዮጵያ ኤሌክትሪክ ኃይል አገልግሎት ኮሙዩኒኬሽን ዳይሬክተር ሞገስ መኮንን አሳውቀዋል፡፡

የሕዳሴ ግድብ ሲጠናቀቅ ደግሞ የሚያስገኘውን ተጨማሪ የውጭ ምንዛሬ በማሰብ በዘላቂነት ከተረጅነት የሚያስወጣውን መንገድ አቅዶ መንቀሳቀስ አስፈላጊ መሆኑን አስምረውበታል፡፡

ዶላሩ በመቅረቱ ከጉዳቱ ይልቅ ጠቀሜታው እንደሚያመዝንባቸውም ዶክተር አረጋ አንስተዋል፡፡ በሌላ በኩል እርዳታ ማንንም ሀገር እንደማይለውጥ አብራርተዋል፡፡

ዛምቢያዊ የምጣኔ ሃብት ባለሙያና ፀሐፊ ዶክተር ዳምቢሳ ሞዮ “ዘ ዴድ ኤድ” በተሰኘው መጽሐፋቸው እርዳታ ጥገኝነትን ከማጎልበት (ከማዳበር) ውጭ ጠቀሜታ እንደሌለው ማደማደማቸውን ምሁሩ በማስረጃነት አቅርበዋል፡፡

በፓለቲካው አሜሪካና የሀገሪቱ ወዳጅ የአውሮፓ ሀገራት ሙሉ በሙሉ ወደ ግብጽና ከኢትዮጵያ በተቃራኒ ጎራ ወደ ተሰለፉ ሀገራት ፊታቸው እንዲያዞሩ ሊያደርጋቸው እንደሚችል ጠቁመዋል፡፡ በሌላ በኩል ግን ከኢትዮጵያ ጎን ከተሰለፉት እንደ ቻይና ካሉ ሀገራት ጋር ግንኙነቱ የበለጠ እንዲጠናከር ያደርገዋል ብለዋል፡፡

Be First to Comment

Leave a Reply

Your email address will not be published. Required fields are marked *