Press "Enter" to skip to content

ቢልጌትስና ጋዜጣ ሻጩ

ቢልጌትስ በአለም ቁጥር አንድ ሀብታም በነበረበት ወቅት “ካንተ የሚበልጥ ባለጸጋ እዚህች ምድር ላይ አለ ወይ?” የሚል ጥያቄ ቀረበለት።
ቢል ጌትስም እንዲህ ሲል መለሰ “አዎ፣ ከኔ በላይ ባለጸጋ የሆነ አንድ ሰው አለ” በማለት አንድ ታሪክ መናገር ጀመረ

“ልክ እንደ ዛሬው ሀብታምና ዝነኛ ከመሆኔ በፊት በኒውዮርክ አውሮፕላን ማረፊያ ጋዜጣ ለመግዛት አንድ ጋዜጣ ሻጭ ጋ ሄድኩ። የኪስ ቦርሳዬን ስፈትሽ ግን ዝርዝር ሳንቲም አልነበረኝምና ጋዜጣውን ወደ ቦታው መለስኩ። ጋዜጣ ሻጩ ጠራኝና “ውሰደው ችግር የለም፣ እኔ እከፍላለሁ” ብሎ ሰጠኝ። ጋዜጣውን ወስጄ አነበብኩ። እንደ አጋጣሚ ሆኖ ከሁለት ወይ ከሶስት ወር በኋላ እዝያው አውሮፕላን ማረፍያ ካለ ጋዜጣ ሻጭ ጋ ሄድኩ። አሁንም ግን ዝርዝር ሳንቲም አልነበረኝም።

አሁንም ሻጩ ጋዜጣውን በነጻ ሰጠኝ። አልፈልግም፣ ይቅርብኝ ብልም “ግድ የለህም እኔ ከገቢዬ እሸፍነዋለሁ” ብሎ አስገደደኝ። ወሰድኩ። ከ19 አመታት በኋላ በሀብትም በዝናም ታዋቂ ከሆንኩ በኋላ ይህን ጋዜጣ ሻጭ አስታወስኩትና ማፈላለግ ጀመርኩ። ከአንድ ወር ከ15 ቀናት ፍለጋ በኋላ አገኘሁት።እንዳገኘሁት “ታውቀኛለህ?” ብዬ ጠየኩት። “አዎ፣ ቢል ጌትስ ነህ” ብሎ መለሰልኝ። “ትዝ ይልሀል ጋዜጣ በነጻ ሰጥተሀኝ ነበር” ብዬ ጠየኩት “አዎ ካንዴም ሁለት ጊዜ ጋዜጣ በነጻ ሰጥቼሀለሁ” አለኝ።

በጣም ተደንቄ “በል አሁን በህይወትህ እንዲኖርህ የምትፈልገውን ነገር ንገረኝና ላድርግልህ” አልኩት። “ጌታዬ ለኔ ይህን በማድረግ ልትረዳኝ አትችልም” ሲል መለሰልኝ “ለምን?” በአግራሞት ጠየኩት “አየህ እኔ የረዳሁህ አንድ ደሀ የጋዜጣ ሻጭ በነበርኩበት ወቅት ነው። አንተ ግን ልትረዳኝ የመጣኸው በአለም ቁጥር አንድ ባለጸጋ ከሆንክ በኋላ ነው።

ታዲያ ይህ እንዴት ይመጣጠናል?” በዚያች ቀን ያ የጋዜጣ ሻጭ ከኔ በላይ ባለጸጋ መሆኑን ተረዳሁ። ምክኒያቱም ሰውን ለመርዳት እንደኔ ሀብታም እስኪሆን አልጠበቀም። ድህነቱ እኔን ከመርዳት አላገደውም። ሰዎች ትክክለኛው ባለ ጸግነት የገንዘብ ብዛት ሳይሆን ቅን አሳቢ ልብ መሆኑን መረዳት አለባቸው። ቅን ልብ ያላቸው ሰዎች በአለም ላይ እጅግ ባለ ጸጋዎችና የተወደዱ ናቸው።” በማለት ቢል ጌትስ በሀብት የሚበልጡት ሰዎች እንዳሉ ተናገረ።

(የትነበርክ ታደለ – ትርጉም)

Be First to Comment

Leave a Reply

Your email address will not be published. Required fields are marked *