Press "Enter" to skip to content

ጋዜጠኛ ቴዎድሮስ ተ/አረጋይ በፌስ ቡክ ያቀረበው የ100 ሺህ ብር አበድሩኝ ጥያቄ በአምስት ደቂቃ ውስጥ አንድም ቀን አናግሮት ከማያውቀው ሰው እንደተሳካለት አስታወቀ

በቀላሉ ስሜቴን የሚነኩት ጉዳዮች አሉ ። አንዱ አጋጣሚ ይህ ነው ። ድንገት ከእንቅልፌ ስነሳ አስፈላጊዬ የነበረው 100,000:00 ብር ቀድሞ ነቅቶ ጠበቀኝ ። ወይም እሱም ይሆናል የቀሰቀሰኝ ። ” ለምን ፖስት አላደርገውምና ያመነኝ አይሰጠኝም ? ” ብዬ አሰብኩ ። ገንዘቡን ያገኘሁ ያህል ደስ አለኝ ። የማላውቀው እርግጠኛነት ተሰማኝ ። ቀድሞ ስለ እርግጠኛነት መጻፍን አልፈለኩትም ። ይሁንና ግን ዛሬም ይሁን ነገ እንደማገኝ እርግጠኛ ነበርኩ ። ደግሞ ለራሴም እጅግ እርግጠኛ የነበርኩት ብሩ ከማላውቃቸው ሰዎች እንደሚላክልኝ ነው ። እንዲህ ይፈጥናል ብዬ ግን አልጠበኩም ።

የብድር ጥያቄውን ፖስት ባደረግሁ 10 ደቂቃ ባልሞላ ጊዜ ውስጥ ካሁን ቀደም አንድም ቀን ቻት አድርገን ከማናውቀው ሰው ከታች ያለው 50,000:00 ብር ዛሬና ነገን ቀሪውን ደግሞ ለሚቀጥለው ሳምንት ቃል ተገባልኝ ። ነገሩ አስደንጋጭ ቢሆንም የምጠብቀው ነበር ። ያም ሆኖ የማላውቀው ሰው 100,000:00 ብር ያለምንም ፊርማና ማስያዣ ወይም እማኝ ይልክልኛል ብዬ አላሰብኩም ። ገና ቀኑ ሳይነጋ አንዲት ጓደኛዬ ከባህር ደንግጣ ማዶ ደውላ 45,000:00 ፣ ሌላም የቅርቤ ሰው ” አስቀድመኸኝ እንዳይሆን ” ብሎ 50,000:00 ብር እንደሚልኩልኝ አሳወቁኝ ። እነሱ ቢያምኑኝ አይገርመኝም ።

3:10 ሰዓት በሞባይሌ ከሁሉም ቀድሞ ቃል ከገባልኝ ሰው በምታዩት መልክ 50,000:00 ብር ገቢ ተደረገልኝ ። ከሌሎች እዚሁ ፌስቡክ ላይ ከማውቃቸው 6 ወዳጆቼ እያንዳንዳቸው 10,000:00 ሊልኩልኝ ፈልገው የሂሳብ ቁጥሬን እንድልክ ጠይቀውኛል ። ለሁሉም አላኩም ። ምክንያቱም የምፈልገውን መጠን ስላገኘሁ ። ደቡብ አፍሪካ ከሚኖር አንድ ስሙን የማልገልጸው ከአመታት በፊት የማውቀው ሰው ” ፍልስምና ፫ ” እና ፍልስምና ፬ ” ሁለት መጻሕፍት እንድልክለት ብቻና ብሩን እንዳልመልስ ደግሞ ደጋግሞ በጽሑፍና በድምጽ ላከልኝ ። እጅግ ይክበርልኝ ። የምፈልገው የምመልሰውን ብቻ መሆኑን ገልጬ አመሰገንኩት ። ሌሎችም መልካም ሰዎችም በምጽፈው ሀሳብ እየተናደዳችሁብኝ ጭምር ከጎኔ ልትቆሙ ቃላችሁን ሰጥታችሁኛል ።

ኢትዮጵያዊ መሆን ማለት ለእኔ ይህ ነው ። ሁሌም በኢትዮጵያውያን ላይ አልሳሳትም ። ይህ አጋጣሚ ከኢትዮጵያዊነትም በላይ በሰው ዘንድ ያለኝን አመኔታና ቦታ አረጋግጬበታለሁ ። በእርግጥም መታመኔ ላይ ትምክህት አለኝ ። የማልዋሸውና ስሙን በከንቱ የማልጠራው ፣ ስሳሳትም ከመቅጽበት በህሊናዬ ከስሩ የምወድቅለት አምላክ አለኝ ። የምፈልገውን ባላገኝም ሌላ መንገድ ከፊቴ እንደሚከፈት አምን ነበር ። የሆነው ሁሉ ሆነ ።

ቢኖራችሁ የምትሰጡኝን ፣ ልትሰጡኝ እየቻላችሁና እየፈለጋችሁ ካሁን ቀደም በደረሱባችሁ ተደጋጋሚ የቃል መታጠፎች ልትሰጡኝ ላልቻላችሁ ጭምር የከበረ ምስጋና አቀርባለሁ ። ለሰጣችሁኝ ሁሉ ቃሌን ለማክበር አምላክ ይርዳኝ ። እጅግ እጅግ አመሰግናለሁ ። ያው ወደሌሎች ሀሳቦቻችንና ንትርኮቻችን እንገባለን ።

Be First to Comment

Leave a Reply

Your email address will not be published. Required fields are marked *