SHARE

በአዲስ አበባ ከተማ ቦሌ ክ/ከተማ ወረዳ 11 አራብሳ ለሚ ኮብልስቶን ማምረቻ አካባቢ ስኳር እና ኬሚካል ከቀይ አፈር ጋር በመቀላቀል ማር ነው ብሎ ለመሸጥ ሲያዘጋጅ የነበረ ግለሰብ እጅ ከፍንጅ መያዙን የአዲስ አበባ ፖሊስ ኮሚሽን አስታወቀ።

ግለሰቡ ሙሉ መኖሪያ ግቢ ተከራይቶ ሕገ ወጥ ተግባሩን ሲፈጽም በቁጥጥር ስር ሊውል የቻለው ፖሊስ በጥርጣሬ ባደረገው ማጣራት ነው ተብሏል።

በቦሌ አራብሳ አካባቢ ፖሊስ ጣቢያ የወንጀል መከላከል አባል ሳጅን ድንበሩ ጥላሁን፣ ለሥራ በሚንቀሳቀሱበት ወቅት ከፍተኛ ጭስ ከግቢው ሲወጣ ተመልክተው ሲጠይቁ እንጀራ እየጋገርን ነው የሚል ምላሽ ቢሰጣቸውም ተጠራጥረው ባደረጉት ማጣራት ሕገ ወጥ ድርጊት እየተፈጸመ መሆኑን በማረጋገጥ ለሚመለከተው የአስተዳደር አካል ሪፖርት ማድረጋቸውን ተናግረዋል።

ከጉዳዩ ጋር በተያያዘም አንድ ተጠርጣሪ በቁጥጥር ስር ውሎ ምርመራ እየተጣራበት ይገኛል ብለዋል።

በቦሌ ክ/ከተማ የወረዳ 11 ንግድ እና ኢንዱስትሪ ጽ/ቤት ሓላፊ አቶ አድነው ወልዴ በበኩላቸው፣ ግለሰቡ መርካቶን ጨምሮ በተለያዩ አካባቢዎች ማር ነው ብሎ ያዘጋጀውን ባዕድ ነገር ሲሸጥ እንደቆየ ገልጸዋል።

ከኮሮና ቫይረስ (COVID -19) ወረርሽኝ ጋር ተያይዞ ተገቢ ያልሆነ ድርጊት በሚፈጽሙ እና ያልተገባ የዋጋ ጭማሪ በሚያደርጉ ነጋዴዎች ላይ ቁጥጥሩ ተጠናክሮ እንደሚቀጥልም አቶ አድነው መናገራቸውን የአዲስ አበባ ፖሊስ ኮሚሽን አስታውቋል።

LEAVE A REPLY

Please enter your comment!
Please enter your name here