SHARE

(ኢ.ፕ.ድ)b ህብረተሰቡ የብልጽግና ፓርቲን ዓላማ ለማሳካት ድጋፉን በተግባር ማሳየቱን የፓርቲው ገቢ አሰባሳቢ ኮሚቴ ገለጸ። ኮሚቴው ለፓርቲው ድጋፍ ላደረጉ አካላት ምስጋና አቅርቧል።

ፓርቲው ትናንት ባካሄደው የገቢ ማሰባሰብ መርሃ ግብር 1 ነጥብ 5 ቢሊዮን ብር አግኝቷል። ከዚሁ ውስጥ 1 ነጥብ 3 ቢሊዮን በካሽ መሰብሰቡንም ነው የገቢ አሰባሳቢ ኮሚቴው ዛሬ በሰጠው መግለጫ ያስታወቀው።

የኮሚቴው አባላት የሰላም ሚኒስትር ወይዘሮ ሙፈሪያት ካሚል፣ የፌዴራል ጠቅላይ ዐቃቤ ሕግ ወይዘሮ አዳነች አበቤ እና የትራንስፖርት ሚኒስትር ወይዘሮ ዳግማዊት ሞገስ ናቸው መግለጫውን የሰጡት።

በዚሁ ጊዜ በገቢ ማሰባሰብ ሂደቱ ከአርሶ አደር እስከ ነጋዴ፣ ከተማሪ እስከ ሰራተኛ በፈቃደኝነት ድጋፍ ማድረጋቸው ነው የተገለጸው።  ገቢውን ለማሰባሰብ በፌዴራል ደረጃ ኮሚቴ ተቋቁሞ ሲሰራ እንደነበር አስታውሰው፤ በክልሎችም በአጭር ጊዜ ውጤታማ ስራ ሊሰራ መቻሉን ኮሚቴው አመልክቷል።

ከዚህ ባለፈ 2 ሺህ 600 በሬ፣ ግመልና ፍየል መገኘቱን ገልጸው፤ ”ይህ ሃብት ወደ ገንዘብ የሚቀየር ነው” ብለዋል። ብልጽግና ፓርቲ በየዞኑ ባለው ጽህፈት ቤት የገቢ አሰባሳቢ ኮሚቴ ተቋቁሞ በየዞኑ የተለያዩ የህብረተሰብ ክፍሎችና መካከለኛ ባለሃብቶች ለፓርቲው ያላቸውን ድጋፍ አሳይተዋል ተብሏል።

ፓርቲው በአጭር ጊዜ ይህን ያህል ገቢ መሰብሰብ መቻሉ ህብረተሰቡ የፓርቲውን ዓላማ መደገፉን በተግባር ያረጋገጠበት መሆኑን ኮሚቴው ገልጿል። ፓርቲው የመንግስትና የፓርቲን የፋይናንስ ምንጭ በመለየት በራሱ ገቢ የተለያዩ ስራዎችን የማከናወን ቁርጠኛ ዓላማ እንዳለው ገልጸው፤ ”የገቢ ማሰባሰብ መርሃ ግብሩ ዓላማውን ለማሳካት ያለመ ነው” ብለዋል።

አብዛኛውን ገቢ በፌዴራል ደረጃ ያሉ ግለሰቦችና መካከለኛ ባለሃብቶች ማስገኘታቸውን የገለጸው ኮሚቴው ቀሪው በክልሎች ደረጃ የተሰበሰበ መሆኑን አስታውቋል።

ትናንት በነበረው የገቢ ማሰባሰቢያ ላይ የመድረክ አስተዋዋቂው አንድ ግለሰብ 500 ሺህ ብር ለመለገስ ቃል መግባታቸውን በመሳሳት ”500 ሚሊዮን ብር ቃል ገብተዋል” ማለቱ ስህተት መሆኑ ተገልጿል።

በሌላ በኩል በምዕራብ አርሲ ዞን ያሉ ባለሃብት 32 ሚሊዮን ለመለገስ ቃል እንደገቡ የተገለጸው ስህተት መሆኑንና ባለሃብቱ 3 ነጥብ 2 ሚሊዮን መለገሳቸው ተገልጿል።

የገቢ ማሰባሰቢያ መርሃ-ግብሩ የመጀመሪያው ምዕራፍ ሲሆን እስከ አንድ ወር ሁለት ምዕራፎች ይካሄዳሉ ተብሎ ይጠበቃል። በመጀመሪያው ምዕራፍ አንድ ቢሊየን ብር ለመሰብሰብ የታቀደ ሲሆን ከዕቅዱ በላይ 1 ነጥብ 5 ቢሊዮን ብር መሰብሰብ ተችሏል።

ፓርቲው ትናንት ከሰበሰበው 1 ነጥብ 5 ቢሊዮን ብር ውስጥ 100 ሚሊዮን ብር ለኮረና ቫይረስ መከላከያ ለንጽህና መጠበቂያ መለገሱን ትላንት የፓርቲው ፕሬዚዳንት ዶክተር አብይ አህመድ ቃል መግባታቸው ይታወሳል። ይህን ተከትሎ ድጋፉ በጤና መዋቅሩ በኩል ተፈጻሚ እንደሚሆን ኮሚቴው አስታውቋል።

LEAVE A REPLY

Please enter your comment!
Please enter your name here