SHARE

የጎንደር ዩኒቨርሲቲ የሦስተኛ ዓመት የኢንፎርሜን ቴክኖሎጂ ተማሪዎች በጎንደር ዩኒቨርሰቲ ሆስፒታል የሚገኙ ሕሙማንን ዛሬ ተዘዋውረው ጠይቀዋል፡፡ ‹‹ላስተማረን ኅብረተሰብ የችግሩ ፈች እንጅ የችግሩ ምንጭ ላለመሆን

በዩኒቨርሲቲዎች እየታዬ ያለውን ችግር አርዓያ በሚሆን ሥራ ለመተካትና ሌሎች እንዲከተሉን ለማድረግ ስለፈለግን ጊዜና ገንዘባችንን ሕክምና ላይ ያሉ ወገኖቻችንን በመጠየቅ ላይ አውለናል›› ብለዋል ተማሪዎቹ፡፡

‹‹ለኅብረሰተሰባችን ፈውስ እንጅ ሕመም ላለመሆን እንማራለን›› በሚል በጎንደር ዩኒቨርሲቲ የኢንፎርሜሽን ቴክሎጂ የሦስተኛ ዓመት ተማሪዎች ታካሚዎችን ለመጠየቅ እንደወሰኑ የመርሀ ግሩ አስተባባሪ ተማሪ ናሆም ግርማ ተናግሯል፡፡

በዩኒቨርሲቲዎች ተማሪዎች ለመመረቅ ግማሽ ዓመት ሲቀራቸው የሚያከብሩት ልዩ መርሀ ግብር አላቸው፤ መርሀ ግብሩን በመጨፈርና ሌሎች ጠቃሚ ባልሆኑ ሁነቶችና ክዋኔዎች ነው የሚያብሯቸው፡፡

የጎንደር ዩኒቨርሲቲ የኢንፎርሜሽን ቴክኖሎጂ ተማሪዎች ግን ‹‹የታመሙ ወገኖቻችን በመጠየቅ መልካም ተግባርን በመሥራት ለኅሊና የሚያረካ ድርጊት መፈጸም አለብን፤ ይህንንም ሌሎች የትምህርት ክፍሎችና የሌሎች ዩኒቨርሲቲ ተማሪዎች አርዓያነቱን እንዲወስዱ ጀማሪ መሆን አለብን›› ብለው እንደወሰኑና ወደ ተግባር እንደገቡ ተማሪ ናሆም አስታውቋል፡፡

‹‹እርስ በእርስ ከመጎዳዳት ወጥተን የተጎዱትን በመጠየቅና የሚያድን ሥራ በመሥራት ያስተማረንን ኅብረተሰብ ከኛ የሚጠብቀውን መልካም ነገር እንዲያገኝ ልንሠራ ይገባል›› ብሏል፡፡

ተማሪ ኅሊና አስፋው ደግሞ ‹‹ለጊዜያዊ ደስታ ከመብላትና መጠጣት ወጥተን ኅሊና በሚመግብ ሥራ ላይ በማሳለፋችን አስደስቶናል፤ የሠላሙን ዩኒቨርሲቲያችን በጎነትና አንድነት መገለጫው እንዲሆን ከተለያዩ አካባቢዎች የመጣን ተማሪዎች አንድ ሆነን በመልካም ተግባር ጊዜያችንንና ገንዘባችንን አውለናል›› ብላለች፡፡

ተማሪዎች ከሌላ ለግጭት ከሚጋብዙ አርዕስቶች ወጥተው ሀገርና ቤተሰብን በሚጠቅም ሥራ ላይ እንዲውሉ መልካም ጅማሮ መሆኑንም ተማሪዎቹ ተናግረዋል፡፡

ልጃቸውን በሆስፒታሉ እያስታመሙ ከነበሩ ተጠያቂ ቤተሰብ መካከል አቶ ዋለልኝ አቤ ‹‹ካላቸው ገቢ ቀንሰው፣ ለወገን ደራሽ ወገን ነው ብለው አስበው፣ በዩኒቨርሲቲዎች የምንሰማውን ክፉ ወሬ በመልካም ቀይረው እግዚያአብሔር ይማራችሁ ለማለት ስለመጡ በልጆቻችን ደስ ብሎናል፤ እኛ ወላጆች የምንፈልገውም ይህንን ነውና ሌሎችም እንዲማሩበት አደራ›› ብለዋል፡፡

ተማሪዎቹ በጎንደር ዩኒቨርሲቲ ሆስፒታል በተለያዩ ክፍሎች ለሚገኙ ታካሚዎች የታሸገ ውኃ፣ ብርቱካን፣ ሙዝ፣ ለሕጻናት ኬክና የሕጻናት መጫዎቻዎችን በስጦታ አበርክተዋል፡፡

LEAVE A REPLY

Please enter your comment!
Please enter your name here