Sun. Jan 17th, 2021

Ethiopian Intercept

We Share News

የሳዑዲ ልዑል አልጋወራሽ መሃመድ ቢን ሰልማን በጋዜጠኛ ጀማል ካሾጊ ግድያ ሃላፊነት ወሰዱ

የሳዑዲ ዓረቢያ ልዑል አልጋወራሽ መሃመድ ቢን ሰልማን በጋዜጠኛ ጀማል ካሾጊ ግድያ ሃላፊነት መውሰዳቸውን አስታውቀዋል። ኢስታንቡል በሚገኘው የሳዑዲ ዓረቢያ ቆንፅላ ውስጥ የተገደለው ጋዜጠኛ ጀማል ካሾጊ ጉዳይ በርካታ ሀገራትን ሲያወዛግብ መቆየቱ ይታወቃል።

የአሜሪካው ፕሬዝዳንት ዶናልድ ትራምፕም ጨምሮ የበርካታ ሀገራት መሪዎች የጋዜጠኛው ግድያ ተቀባይነት የሌለው ኢሰብዓዊ ድርጊት በማለት አውግዘውትም ነበር። ከጋዜጠኛው ግድያ ጋር በተያዘ የሳዑዲ የደህንነት ከፍተኛ ሹማምንቶች ከስልጣናቸው ሲነሱ፣ ከግድያው ጋር ግንኙነት አላቸው የተባሉ 18 የሳዑዲ ዜጎች ደግሞ በፖሊስ ቁጥጥር ስር መዋላቸውም ይታወሳል።

ሲ አይ ኤ እና የተለያዩ የምዕራብ ሀገራት መሪዎች በበኩላቸው ጋዜጠኛው የተገደለው በሳዑዲ ዓረቢያ ልዑል አልጋወራሽ መሃመድ ቢን ሰልማን ቀጥተኛ ትዕዛዝ መሆኑን አስታውቀው ነበር።

በአንፃሩ የሳዑዲ ዓረቢያ ባለስልጣናት የጀማል ካሾጊ ግድያ እንደተባለው በልዑሉ ትዕዛዝ የተፈጸመ አለመሆኑን ሲያስተባብሉ ቆይተዋል። ይሁን እንጂ ልዑል አልጋወራሽ መሃመድ ቢን ሰልማን ፒ ቢ ኤስ ከተሰኘ የመገናኛ ብዙሃን ድርጅት ጋር ባደረጉት ቆይታ የጋዜጠኛ ጀማል ካሾጊ ግድያ በእርሳቸው ዕይታ ውስጥ መፈጸሙን ተናግረዋል።

ለዚህም ሙሉ ሃላፊነቱን እወስዳለሁ ነው ያሉት ልዑል አልጋ ወራሹ። የሳዑዲ ዓረቢያ መንግስት ክፉኛ በመተቸት የሚታወቀው ጋዜጠኛ ጀማል ካሾጊ ከአንድ ዓመት በፊት ጋብቻ ለመፈፀም የሚያስችለውን ሂደት ለመፈፀም በቱርክ በሚገኘው የሀገሪቱ ቆንፅላ በገባበት ወቅት ነበር በአሰቃቂ ሁኔታ የተገደለው።

Subscribe To Our Newsletter

[mc4wp_form id="318"]