SHARE

በኢትዮጵያ ከስምንት ሚሊዮን በላይ ለሚሆኑ የአስቸኳይ ዕርዳታ ፈላጊዎች ከዓለም አቀፍ ለጋሾች ተጨማሪ ገንዘብ እንደሚያስፈልግ የተባበሩት መንግሥታት ድርጅት ምክትል ዋና ጸሐፊና የሰብዓዊ ጉዳዮችና የአስቸኳይ ዕርዳታ አስተባባሪ አስታወቁ፡፡

የተመድ ምክትል ዋና ጸሐፊ ማርክ ሎውኮክ ለሁለት ቀናት በኢትዮጵያ ያደረጉትን ጉብኝት ካጠናቀቁ በኋላ በሰጡት መግለጫ፣ ከስምንት ሚሊዮን በላይ ሰዎች ምግብ፣ መጠለያ፣ መድኃኒትና ሌሎች አስቸኳይ ዕርዳታዎች ያስፈልጓቸዋል ብለዋል፡፡

ኢትዮጵያ ድርቅን ጎርፍን የወረርሽኝ በሽታዎችንና ሚሊዮኖችን ከቤቶቻቸው ያፈናቀሉ የብሔር ግጭቶችን ጨምሮ ተደጋጋሚና ዘርፈ ብዙ ሰብዓዊ ችግሮችን መቋቋም ይኖርባታል ሲሉም አስረድተዋል፡፡

በ2019 የኢትዮጵያ በሰብዓዊ ዕርዳታ ጥያቄ ምላሽ ዕቅድ መሠረት ቁጥራቸው ከላይ የተገለጸው የአስቸኳይ ዕርዳታ ፈላጊዎች 1.3 ቢሊዮን ዶላር ያስፈልጋቸዋል፡፡ ነገር ግን እስካሁን ማግኘት የተቻለው 51 በመቶ ሲሆን ከፍተኛው የዕርዳታ ድጋፍ የተገኘው ከኢትዮጵያ መንግሥት ነው፡፡ መንግሥት 288 ሚሊዮን ዶላር በመመደብ ከለጋሾች የበለጠ ለምግብ ዕርዳታ ማቅረቡ ተገልጿል፡፡

ተመድ ከዓለም አቀፍ ለጋሾች ከፍተኛ የሆነ ዕርዳታ እንደሚያስፈልግ በመግለጽ፣ አስቸኳይ ምላሽ እንዲኖር ጥሪ አቅርቧል፡፡ ተጨማሪ ገንዘቡ የሚያስፈልገው ለተመጣጠኑ ምግቦች ለጤና ለመጠለያ ለትምህርትና ለመሰል ተግባራት መሆኑን አስታውቋል፡፡

የተመድ ምክትል ዋና ጸሐፊና አብረዋቸው የነበሩ የሥራ ኃላፊዎች ተመድ መንግሥትን ለመደገፍ ፍላጎት እንዳለው በመግለጽ በተለይ ከቀዬአቸው በግጭት ምክንያት የተፊናቀሉ ወገኖች በፈቃደኝነት ወደ ቀድሞ ቦታቸው እንዲመለሱ እንደሚያግዝም አስረድተዋል፡፡ ለዚህም መኖሪያ ቤት መሬት ለኑሮ የሚያስፈልጉ ቁሳቁሶችና ለትምህርት ቤቶች ዕገዛ ለማድረግ ፍላጎቱ መሆኑን ጠቁመዋል፡፡

በሌላ በኩል ዕርዳታ በሚሊዮኖች ለሚቆጠሩ ኢትዮጵያውያን ዋነኛ ጉዳይ ቢሆንም ብዙዎቹ የሰብዓዊ ዕርዳታ ፍላጎቶች ተመሳሳይ ተደጋጋሚና ተጋማች መሆናቸው ተገልጿል፡፡ እንዲህ ዓይነት የዕርዳታ ፍላጎቶችን ለመቀነስና የመቋቋም አቅም ለመገንባት የረዥም ጊዜ መፍትሔዎች እንደሚያስፈልጉ ተመድ አስታውቋል፡፡

የኢትዮጵያ መንግሥት ለመፈናቀል ችግሮች ያለውን ዘላቂ መፍትሔና ፍላጎት እንደግፋለን፡፡ ይህንንም ገቢራዊ ለማድረግ ቀላል እንዳልሆነ እረዳለሁ፡፡ ተፈናቃዮቹ ባለፈው ዓመት ከቀዬአቸው ሲፈናቀሉ በደረሰባቸው ጉዳት ሳቢያ ተመልሰው ለማረስም ሆነ ለመኖር እንደሚቸገሩም አምናለሁ፡፡ ነገር ግን መንግሥት ይህንን ችግር ለመፍታት ጥረት ማድረግ አለበት፡፡ በአሁኑ ጊዜ ተፈናቃዮቹ በሚመለሱባቸው አካባቢዎች ብዙዎች ያልተቆጠበ ድጋፍ እያሳዩ ሲሆኑ የረድኤት ድርጅቶችም እየተረባረቡ ነው፡፡ ነገር ግን ከዓለም አቀፉ ማኅበረሰብ ተጨማሪ ድጋፍ ያስፈልጋል ሲሉ ምክትል ዋና ጸሐፊው አስረድተዋል፡፡

ለጋሾች በታሪክ በአስከፊ የቀውስ ጊዜ ለኢትዮጵያ በከፍተኛ ደረጃ ቸር እንደነበሩ ገልጸው አሁንም ተጨማሪ ድጋፍ በማድረግ ይህንን ፅኑ ችግር ለመቋቋም የሚያስችል አቅም ለመገንባትና ተደጋጋሚውን የቀውስ አዙሪት ለመበጠስ እንዲቻል ድጋፍ እንደሚያደርጉ እምነት እንዳላቸው አስታውቀዋል፡፡

ምክትል ዋና ጸሐፊ ሎውኮክ አፅንኦት የሰጡት ሌላው ጉዳይ በኢትዮጵያ የዕርዳታ ሠራተኞችን ደኅንነት የተመለከተ ነው፡፡ በቅርቡ ጋምቤላ ክልል ውስጥ ሁለት የዕርዳታ ሠራተኞች መገደላቸውን በማስታወስ፣ ይህንን አስከፊ ጥቃት እያወገዝን በግድያው ምክንያት ሊኖሩ የሚችሉ አንድምታዎችን ከሚመለከታቸው አካላት ጋር እየተነጋገርንባቸው ነው ብለዋል፡፡

ሪፖርተር

LEAVE A REPLY

Please enter your comment!
Please enter your name here