Press "Enter" to skip to content

የአማራ ባንክ በሶስት ሳምንት ብቻ 2 መቶ ሚሊዮን አክሲዮን መሸጡን ገለጸ

Last updated on September 11, 2019

(አብመድ) የአማራ ባንክን ለማቋቋም የሚያስችል የአክሲዮን ሽያጭ ከተጀመረ ሦስት ሳምንታት አልፈዋል፡፡

የባንኩ አደራጅ ኮሚቴ ሰብሳቢ አቶ መላኩ ፈንታ ዛሬ ከአብመድ ጋር ባደረጉት ቆይታ እንደገለጹት ባንኩ የሚቋቋመው የአማራን ሕዝብ የኢኮኖሚ ተጠቃሚነት ለማሳደግ እና ሀገራዊ ልማትን ለመደገፍ ነው፡፡ ዝቅተኛው የአክሲዮን ሽያጭ ከ10 ሺህ ብር እንደሚጀምርና ይህም ዝቅተኛ የኅብረተሰብ ክፍሎችን እንደሚያበረታታ ነው አቶ መላኩ የገለጹት፡፡

በሦስት ሳምንታት ውስጥ 2 መቶ ሚሊዮን ብር የሚጠጋ አክሲዮን እንደተሸጠም አስታውቀዋል፡፡

“ባንኩ ከተመሠረተ ጀምሮ ወደ ሥራ እንዳይገባ የሚደረጉ ዘመቻዎች አሉ፤ አንደኛው ከብሔር ጋር የማስተሳሰር አባዜ ነው፤ እውነታው ግን የሕዝብ የመልማት ፍላጎት ያመጣው ፕሮጀክት ነው” ብለዋል የአደራጅ ኮሚቴ ሰብሳቢው፡፡ የአክሲዮን ሽያጩ እንደተጠናቀቀ ተደርጎ የሚሰራጨው መረጃም ሀሰተኛ እንደሆነ ነው የተገለጸው፡፡

‘የኢትዮጵያ ንግድ ባንክ የ30 በመቶ አክሲዮን ሊገዛ ደብዳቤ አስገብቷል’ ተብሎ በማኅበራዊ መገናኛ ብዙኃን የተሰራጨው መረጃ መሠረተ ቢስ መሆኑንም አረጋግጠዋል፡፡
የአክሲዮን ግዥ ጠያቂዎች ቁጥር በመጨመሩ ከአማራ ብድርና ቁጠባ ተቋም (አብቁተ) ጋር በመተባበር ሽያጩን እስከ ቀበሌ ተደራሽ ለማድረግ መታቀዱንም ነው አቶ መላኩ የገለጹት፡፡

የአማራ ባንክ የአክሲዮን ሽያጭን እስከ ሦስት ወራት በማጠናቀቅ ወደ ታሰበው ዓላማ ለማስገባት እየተሰራ እንደሆነ ታውቋል፡፡

Be First to Comment

Leave a Reply

Your email address will not be published. Required fields are marked *